Almatyda Kardıologıa jáne ishki aýrýlar ǴZI-da ekinshi júrek transplantasıasy sátti jasaldy. 6 saǵatqa sozylǵan kúrdeli operasıa University Medical Center-pen birlesip belgili kardıohırýrg Iýrıı Pányń jetekshiligimen ótti.
Dárigerler mı ólimin anyqtaǵannan keıin, týystary qaıtys bolǵan Almaty oblysynyń týmasy 45 jastaǵy er adamnyń organdaryn alýǵa kelisimin berdi.
Olardyń kelisiminiń arqasynda Qazaqstannyń 4 azamatynyń ómiri, olardyń arasynda "dılatasıalyq kardıomıopatıa (ýytty)" kúrdeli júrek aýrýyna shaldyqqan 43 jastaǵy er adamnyń ómiri qutqaryldy. 5 jyl boıy energetıkalyq sýsyndardy shamadan tys tutynýy dári-dármek terapıasyn qabyldamaıtyn júrek qyzmeti jetkiliksizdiginiń sońǵy satysyna ákelgen.
Naýqasty azdaǵan fızıkalyq júktemede aýa jetispeýi, 50 metr júrý kezinde entigý, qalypty jaǵdaıda, jatqan kezde entigýdiń joǵarylaýy, tez sharshaý jáne jalpy álsizdik mazalaǵan. Jaǵdaıynyń nasharlaýy 2023 jyldyń jeltoqsanynan bastap baıqala bastady.
"Elimizde kardıohırýrgıa men kardıoreanımasıanyń damý deńgeıi júrekti transplantasıalaý operasıalarynda oń nátıjelerge qol jetkizýge múmkindik beredi. Iýrıı Vladımırovıch bastaǵan UMC komandasyna kómek pen qoldaý kórsetkeni úshin alǵysymyz sheksiz. Organdardy transplantasıalaý boıynsha operasıalar medısına qyzmetkerleriniń joǵary biliktiligin talap etedi", – deıdi Kardıologıa jáne ishki aýrýlar ǴZI Basqarma tóraǵasy Marat Pashımov.
Marat Orynbasaruly donordyń týystaryna da alǵysyn bildirdi: «Donorlyqqa óz erkimen kelisim berý, adamdardyń ómirin saqtap qalýǵa daıyn bolý – adamgershilik pen meıirimdiliktiń úlgisi. Organdardy alýǵa kelisim bergen donordyń týystarynyń ıgi isi zor qurmetke ıe.
"Naýqastyń jaǵdaıy operasıanyń aýyrlyǵyna sáıkes qalypty. Dınamıka turaqty. Onyń joly bolyp, oǵan donor tabyldy. Keıbireýler aǵzany jyldar boıy kútýi múmkin, biraq olar uzaq kúte almaıdy. Munyń bári sáıkes donordyń bolýyna baılanysty. Pasıentterdiń kópshiligi, ókinishke oraı, transplantasıaǵa jetpeı qaıtys bolady. Júrek transplantasıasynsyz ómir súrý uzaqtyǵy az. Aýyr júrek aýrýlary tez órshıdi jáne shuǵyl emdeýdi qajet etedi", – dep atap ótti klınıkanyń 1-shi basshysy.
Instıtýttyń kardıohırýrgıa bólimshesiniń meńgerýshisi Rústem Tóleýtaev: "Júrekti transplantasıalaý-kúrdeli operasıalardyń biri, alaıda bizdiń alǵan tájirıbemiz, daǵdylarymyz, klınıkamyzdyń tehnıkalyq jaraqtandyrylýy olardy joǵary deńgeıde oryndaýǵa múmkindik beredi", – dedi.
Aıta ketý kerek, donordan eki búırek, ókpe, sonymen qatar kóz qabyǵy alyndy. Búırek Jetisý oblysynyń turǵyny 17 jastaǵy naýqasqa A.Syzǵanov atyndaǵy Ulttyq hırýrgıa ǵylymı ortalyǵynda jáne astanalyq 18 jastaǵy pasıentke University Medical Center-de transplantasıalandy, ókpe – "UMC-te qostanaılyq 43 jastaǵy pasıentke, kóz qabyǵy keratoplastıkasy eki resıpıentke transplantasıalandy.
Aıta keteıik, Qazaqstanda 2025 jylǵy 10 qańtarda júrek transplantasıasyn kútý paraǵynda 140 eresek adam jáne 5 bala tur.