Qazaq tili – halqymyzdyń baǵa jetpes rýhanı murasy, ulttyń tiregi. Ana tilimizdiń mártebesin kóterý, ony qurmettep, keńinen qoldaný – árbir qazaqstandyqtyń basty mindetteriniń biri.
Búginde osy baǵytta elimizdiń jalpy bilim beretin mektepterinde qazaq tiliniń mańyzdylyǵyn nasıhattaýǵa arnalǵan birqatar sharalar uıymdastyrylýda.
№37 jalpy bilim beretin mektep te bul ıgi isterden shet qalǵan joq. Mektep dırektory Gúlmıra Jaqybaevanyń aıtýynsha, bilim mekemesinde qazaq tilin tereńirek meńgerý, onyń qoǵamdaǵy ornyn nyǵaıtý maqsatynda birneshe mańyzdy jobalar men is-sharalardy júzege asyrylyp keledi.
«Tilge degen súıispenshilikti arttyrý – basty maqsatymyz. Mektebimizde jyl saıyn «Til – mádenıettiń aınasy» aptalyǵy ótkizilip, onyń aıasynda túrli ashyq sabaqtar, dóńgelek ústelder jáne shyǵarmashylyq baıqaýlar uıymdastyrylady. Bul is-sharalar oqýshylardyń ana tiline degen qyzyǵýshylyǵyn arttyryp, olardyń sózdik qoryn baıytady» - deıdi mektep basshysy.
Mektepte oqýshylar arasynda esse baıqaýy, «Sóz mergen» saıysy, «Maqal-mátelderdi bilesiń be?» atty vıktorınalar ótkizilip, tilge degen súıispenshilikti damytýǵa erekshe kóńil bólinedi. Sonymen qatar, ata-analardyń qatysýymen kezdesýler ótkizilip, balalardyń tildik mádenıetin qalyptastyrýdaǵy otbasynyń róli talqylanady.
«Til saqshylary» jobasy – oqýshylardyń belsendi qadamy
Bilim oshaǵyndaǵy qolǵa alynǵan erekshe jobalardyń biri – «Til saqshylary». Bul joba oqýshylardy til tazalyǵyn saqtaýǵa, durys sóıleýge, qatesiz jazýǵa baýlýdy maqsat etedi. Joba aıasynda balalar tildiń qorǵaýshylary rólin atqara otyryp, ony qurmetteýge jáne qorǵaýǵa úırenedi. Bul olardyń tildik saýattylyǵyn arttyryp, ulttyq qundylyqtarǵa degen súıispenshiligin qalyptastyrady.
Birliktiń sımvoly
Qazaq tilin dáripteýge baǵyttalǵan jumys barysynda mektep kitaphanasynda «Qazaq ádebıetiniń injý-marjandary» atty kórme uıymdastyrylyp, oqýshylar qazaq jazýshylary men aqyndarynyń shyǵarmalarymen tanysady. Sonymen birge, ulttyq oıyndar, ádebı-mýzykalyq keshter men merekelik qoıylymdar arqyly oqýshylar ulttyq rýhty boılaryna sińiredi.
Mektep – ulttyq qundylyqtardyń besigi
– Qazaq tili – bizdiń bolashaǵymyzdyń negizi. Mektep – tek bilim ordasy ǵana emes, ulttyq qundylyqtardy saqtap, urpaq boıyna darytatyn rýhanı ortalyq. Sondyqtan ana tilimizdi qadirleý, onyń mártebesin arttyrý – bizdiń basty paryzymyz.
Biz, mektep ustazdary, ata-analar men oqýshylar, osy baǵytta birlese jumys isteı otyryp, qazaq tiliniń qoǵamdaǵy ornyn nyǵaıtýǵa jáne jas urpaqtyń tilge degen qurmetin arttyrýǵa bar kúsh-jigerimizdi salamyz. Qazaq tiline degen súıispenshilik – elimizdiń jarqyn bolashaǵynyń kepili, - deıdi №37 jalpy bilim beretin mekteptiń dırektory Gúlmıra Muqataıqyzy.