Almaty qalasyndaǵy hımıa-bıologıa baǵytyndaǵy Nazarbaev Zıatkerlik mektebinde «Zamandastar jyrlaıdy» jáne «Danalyq beısenbi» jobalary aıasynda oqýshylardy qazirgi aqyn-jazýshylardyń shyǵarmalarymen tanystyrý, sóz ónerine baýlý, kórkem ádebıetke degen qyzyǵýshylyqtaryn arttyrý maqsatynda QR Jazýshylar Odaǵynyń músheleri, aqyn, «Baldyrǵan» jýrnalynyń bas redaktory Erǵalı Baqash jáne jazýshy, jýrnalıs Maqsat Málikpen kezdesý ótti, dep habarlaıdy aqshamnews.kz.
Kezdesý shymyldyǵyn Zıatkerlik mektebiniń «Nur-sazy» halyq aspaptar orkestriniń dobyrashylary «Erke sylqym» kúıimen ashty.
Oqýshylar kezdesý qonaqtarynyń shyǵarmashylyǵyna arnalǵan tanystyrý beınebaıan jasap, óleńderin oqyp, áńgimeleri boıynsha pikir almasty. Aldyn ala qalamgerlerdiń shyǵarmalaryn oqyǵan oqýshylar óz oılaryn ashyq aıtyp, shyǵarma tóńireginde ózindik kózqarastaryn jetkizdi.
-Búgin biz oqýshylarmen kezdestik, áńgime qurdyq, óte keremet! Oqýshylardyń oı-óristeri keń ekenin ańǵardyq, oılaý ereksheligi de múldem basqa, erkin jetkizedi. Hımıa-bıologıa baǵytyndaǵy mektepte oqyp bir salaly bolyp qalmaı, ǵylym men ádebıetti qosa alyp júrgenderi, qazaq ádebıetinen habarlary bar ekendigi qýanarlyq jaǵdaı,- dedi Maqsat Málik.
Kezdesý qonaqtary oqýshylarǵa maǵynaly da mándi áńgime aıta otyryp, oqýshylarǵa shyǵarmashylyqpen aınalysýǵa, kórgen-túıgenin jazýǵa yntalandyrdy. Kezdesý sońynda qalamgerler mektep kitaphanasyna, oqýshylarǵa «Baldyrǵan», «Ulan», «Aq jelken» basylymdaryn jáne óz týyndylar jınaǵyn tartý etti.
- Búgingi kezdesýge qatysqan oqýshylardyń, jas talapkerlerdiń ózderin ustaýy, sóıleý mádenıeti, bilim deńgeıleri joǵary eken degen baǵa berýimizge bolady. Qazirgi zamanda balalardyń oıyn jetkizý degen úlken problema,- dep Erǵalı Baqash zıatkerlerdi «Baldyrǵan» jýrnalyna shyǵarmalar jazyp, tyǵyz qarym-qatynas ornatýǵa shaqyrdy.
Taǵylymdy kezdesý sońynda oqýshylar arnaıy ýaqyt bólip kelgen aqyn-jazýshyǵa alǵysyn bildirdi.
- Zıatkerlik mektepte qazaqtyń kórnekti ókilderi – qazirgi zamannyń aqyn-jazýshylarymen kezdesý uıymdastyrý durys jolǵa qoıylǵan. Ár kezdesý oqýshylarǵa oı túıdirip, qazaq ádebıetine qyzyǵýshylyqty arttyrady. Búgingi kezdesý rýhanı álemge saıahat bolyp, zıatkerlerdiń jan-dúnıesin baıytýǵa úlken septigin tıgizdi dep oılaımyn,- dedi uıymdastyrýshy, pedagog-kýrator Janargúl Islamqyzy.