Uly Otan soǵysy ardagerlerin áleýmettik qoldaý týraly Óńirlik komýnıkasıalar qyzmetiniń brıfıńinde Almaty qalasy Jumyspen qamtý jáne áleýmettik baǵdarlamalar basqarmasynyń basshysy Baýyrjan Jaýbasov aıtyp berdi.
Búginde Almatyda Uly Otan soǵysynyń 43 ardageri turady. Olarǵa materıaldyq qoldaý kórsetý úshin jyl saıyn 1 mln teńge mólsherinde birjolǵy tólem júzege asyrylady.
«Almaty qalasy ákiminiń tapsyrmasyna jáne máslıhat sheshimine sáıkes bıyl Uly Otan soǵysynyń ardagerlerine Uly Otan soǵysyndaǵy Jeńis kúnine qosymsha 1 mln teńge tólenedi. Barlyǵy 2024 jyly olar 2 mln teńgeden alady», - dedi B.Jaýbasov.
Osylaısha, 2024 jylǵy Uly Otan soǵysyndaǵy Jeńis kúnine oraı birjolǵy áleýmettik kómek tólemderi belgilendi:
1. UOS ardagerlerine – 2 mln teńge;
2. UOS ardagerlerine teńestirilgen ardagerlerge – 100 myń teńge;
3. basqa memleketterdiń aýmaǵyndaǵy urys qımyldardyń ardagerlerine – 100 myń teńge;
4. Aýǵanstandaǵy nemese soǵys qımyldary júrgizilgen basqa memleketterdegi urys qımyldary kezinde qaza tapqan áskerı qyzmetshilerdiń otbasylaryna – 100 myń teńge;
5. qaıtys bolǵan UOS ardageriniń áıeline – 50 myń teńge;
6. eńbek maıdanyna qatysýshylarǵa – 50 myń teńge.
Uly Otan soǵysynyń ardagerlerine aı saıyn 6,5 AEK (23 998 teńge) mólsherinde, jáne komýnaldyq qyzmet tarıfteriniń ósýine baılanysty 0,8 AEK (2954 teńge) mólsherinde aı saıynǵy áleýmettik kómek túrleri kórsetiledi. Sondaı-aq, UOS ardagerleri:
- sanatorıalyq-kýrorttyq emdelýge tegin joldama alýǵa;
- qalalyq qoǵamdyq kólikte (taksıden ózge) tegin júrýge;
- protezdeý jáne protezdik-ortopedıalyq buıymdarmen (stomatologıalyq buıymdardy qospaǵanda) tegin qamtamasyz etilýge;
- arnaýly áleýmettik qyzmetterdiń kepildik berilgen kólemin (úıde kútim kórsetý, medısınalyq-áleýmettik mekemelerge joldaý) alýda basymdylyqqa;
- ambýlatorıalyq-emhanalyq kómek kórsetetin jáne shuǵyl gospıtalızasıalaýdy qamtamasyz etetin uıymdarda jeńildetilgen kómek alýǵa quqyly.