Búgin Almatynyń Óńirlik komýnıkasıalar qyzmetiniń alańynda veıp aınalymyna qarsy kúres sharalaryna arnalǵan brıfıń ótti. Spıker bolyp Almaty qalasy Polısıa departamenti jergilikti polısıa qyzmeti basqarmasy basshysynyń orynbasary Aıtan Janamanuly Eleýsizov qatysty, dep habarlaıdy aqshamnews.kz
Brıfıń barysynda shegilmeıtin temeki ónimderiniń jáne elektrondyq tutyný júıeleriniń (veıpterdiń) zańsyz aınalymynyń jolyn kesý úshin memleket qabyldaǵan negizgi qadamdar aıtyldy.
Eleýsizov jańa sharalar qabyldaý halyqtyń, ásirese jastardyń densaýlyǵyn temeki ónimderi men elektrondyq temekini tutynýdyń jaǵymsyz saldarlarynan qorǵaýda mańyzdy qadam bolyp tabylatynyn atap ótti. Ol polısıa qyzmetkerleri veıptiń zańsyz aınalymyna baılanysty qylmystardy anyqtaýda jáne tergeýde sheshýshi ról atqaratynyn jáne bul úshin olarǵa arnaıy bilim men daǵdylar qajet ekenin atap ótti.
“2024 jyldyń 20 maýsymynan bastap Almatyda veıpterdiń zańsyz aınalymy faktileri boıynsha 23 qylmystyq is qozǵaldy, onyń 4-ýi sotta qaralyp, sheshimder kúshine endi. Osy ister aıasynda veıpıngke arnalǵan 24 300-den astam qurylǵy tárkilenip, joıyldy", - dedi Aıtan Eleýsizov.
Spıker veıp aınalymyna baılanysty buzýshylyqtardyń quqyqtyq saldaryn egjeı-tegjeıli túsindirdi. Osy buıymdardy satqany, taratqany, ákelgeni jáne óndirgeni úshin eleýli aıyppuldar men qylmystyq jaýaptylyq kózdelgen.
"Veıpterdi satý jáne taratý 738 myń teńgege deıin aıyppulmen nemese túzetý jumystarymen jazalanady. Olardy óndirý men ákelý 7,4 mln teńgege deıin aıyppul salýǵa, túzeý jumystaryna nemese eki jylǵa deıin bas bostandyǵynan aıyrýǵa ákep soǵýy múmkin. Toptasyp jasaǵan is – áreketter nemese asa iri tabys tabý sıaqty asa aýyr qylmystarǵa 18,4 mln teńgege deıin aıyppul salynady nemese múlki tárkilenip, bes jylǵa deıin bas bostandyǵynan aıyrylýy múmkin", - dep túsindirdi Eleýsizov.
Sondaı-aq, veıpterdiń qoǵamdyq qaýiptiligi jáne olardyń densaýlyqqa áseri taqyryby kóterildi. Temeki shegýdiń zıansysh balamasy degen pikir keń taraǵan. Deıturǵanmen, spıker veıpterdiń ókpe men júrektiń aýyr aýrýlaryn týdyrýy múmkin ekenin jáne nıkotınge táýeldilikke yqpal etetinin atap ótti. Sonymen qatar, bir qurylǵyny birneshe márte qoldaný gepatıt jáne týberkýlez sıaqty ınfeksıalardyń taralýyna ákelýi múmkin.
Brıfıń sońynda Eleýsizov veıpterdiń zańsyz aınalymyna qarsy kúres polısıanyń qatań baqylaýynda ekenin jáne bul jumys Almaty turǵyndarynyń densaýlyǵy men qaýipsizdigin qorǵaý úshin júıeli túrde jalǵasatynyn málimdedi.