Bas jáne moıyn qaterli isikterine kómeı, sınýs, joǵarǵy jáne tómengi jaq, aýyz qýysy, jutqynshaq jáne silekeı bezderi sıaqty aımaqtardaǵy qaterli isikter jatady, dep habarlaıdy aqshamnews.kz
Aýrýdyń túrleri kómeı isiginen silekeı beziniń isikterine deıin ózgerip otyrady.
Almaty onkologıalyq ortalyǵynyń onkology Gúlbaný Naqysbek alǵashqy belgileri moıyn aımaǵyndaǵy aýyrsyný nemese isiný, daýystyń ózgerýi, jutynýdyń qıyndaýy, tamaqtyń nemese qulaqtyń turaqty aýyrýy, aýyz qýysyndaǵy jazylmaıtyn jaralar nemese shyryshty qabattardaǵy aq daqtar, sondaı-aq moıyn lımfa túıinderiniń ulǵaıýy bolýy múmkin ekenin aıtady.
Eger sizde osy belgiler bolsa, erte dıagnostıka úshin dárigerge barý mańyzdy.
Qaýip faktorlary temeki shegý, alkogóldi teris paıdalaný, sondaı - aq APV (adam papıllomavırýsy), Epshteın-Barr vırýsy bolyp tabylady, óıtkeni bul vırýs jutqynshaq, kómeı jáne muryn-jutqynshaq isikteriniń keıbir túrlerimen baılanysty.
Bas jáne moıyn qaterli isigi jıi kesh satysynda dıagnoz qoıylady, sondyqtan erte anyqtaý boljamdy aıtarlyqtaı jaqsarta alady. Emdelmeıtin jaralar nemese daýystyń ózgerýi sıaqty kez kelgen erekshe ózgeristerge nazar aýdarý mańyzdy.
Turaqty tekserýler jáne alǵashqy belgilerde dárigerge ýaqtyly barý ásirese qaýipti topqa jatatyndar úshin óte mańyzdy (temeki shegý, alkogóldi teris paıdalaný, APV) — bul qaterli isiktiń aldyn alý men sátti emdeýdiń negizgi qadamdary.
Esińizde bolsyn, erte anyqtalǵan aýrýdy emdeý ońaıyraq.