Almatyda Jandosov – Saıyn – Shalápın kósheleri men Qarǵaly ózeni aýmaǵynda 20 shaqyrym sýmen qamtý jelileri salynady
Almatynyń Áýezov aýdanynda 2024 jyldyń naýryz aıynda «Mamyr-4» shaǵyn aýdanynda 4,5 shaqyrym sýmen qamtý jáne 9,5 shaqyrym sý burý jelilerin salý bastalady. Bul týraly ákim Erbolat Dosaev qala turǵyndarymen kezdesýde aıtty. Bul jumysty 2025 jyldyń naýryz aıynda aıaqtaý josparlanyp otyr. Jańa ınjenerlik komýnıkasıalar 197 úı men 750 turǵyndy qamtıdy.
«Jandosov – Saıyn – Shalápın kósheleri men Qarǵaly ózeni bóliginde 20 shaqyrym sýmen qamtý jáne 22 shaqyrym sý burý jelilerin salý josparlanǵan. Qurylys-montajdaý jumystary 2024 jyldyń mamyr aıynda bastalady. Birinshi kezeńde 4,8 mlrd teńge bólindi», - dedi qala basshysy.
Turǵyndardy sapaly sýmen jáne kárizben qamtamasyz etý maqsatynda Saıyn jáne Ulyqbek kóshelerindegi 4 shaqyrym jeli qaıta jańartyldy. Sonymen qatar, Tóle bı kóshesiniń Saıyn kóshesinen Momyshuly kóshesine deıingi uzyndyǵy 1 shaqyrym sý qubyry qaıta jańartylyp jatyr, ol bıyl naýryzda aıaqtalady. Bul ýchaskelerde sý jáne káriz jelileri 1960-1970 jyldary salynǵan. Jalpy uzyndyǵy 59,3 shaqyrym.
Buǵan qosa, burynǵy «Vosqod», «Sadovod» jáne «Ardager» baý-baqsha seriktestikteriniń 8 kóshesindegi 5,2 shaqyrym ınjenerlik jeliniń qurylysy aıaqtalyp keledi. Qazir abonentterdi jelilerge qosý jumystary qolǵa alynǵan, ol osy naýryzda bitedi.
Erbolat Dosaev 2023 jyldyń qyrkúıek aıynda «Dostyq» shaǵyn aýdanynda jalpy somasy 1,1 mlrd teńgege sý burý jelileriniń qurylysy bastalǵanyn eske saldy. Onyń aıtýynsha, búginde uzyndyǵy 3 shaqyrym bolatyn Rozybakıev, Terme, Táýke han kóshelerindegi ınjenerlik jelilerdiń qurylysy jartylaı aıaqtaldy. Qarjylandyrý kólemi taǵy 1,4 mlrd teńgege ulǵaıady (jalpy somasy 2,5 mlrd teńge). Bul jumystar naýryz aıynda qaıta bastalyp, 2024 jyldyń sońyna deıin jalǵasady.
2024 jyly «Mamyr» shaǵyn aýdanynda jáne Saıyn kóshesiniń boıyndaǵy jalpy uzyndyǵy 3,2 shaqyrym jylýmen jabdyqtaý jelilerin qaıta jańartý josparlanǵan, onyń 2,3 shaqyrym-i 2023 jyly aıaqtaldy, qalǵan 900 metrin qyrkúıek aıynyń sońyna deıin aıaqtaýdy kózdep otyrmyz, - dep sózin túıindedi qala basshysy.