Almatynyń Áýezov aýdanynda 42 shaqyrym astam elektr kabel jelileri jańǵyrtylady
2024 jyly Almaty qalasynyń Áýezov aýdanynda ınvestısıalyq baǵdarlamalar aıasynda 25 shaqyrym elektrmen jabdyqtaý jelilerin jáne 23 transformatorlyq jáne 1 taratý qosalqy stansıasyn jańǵyrtý josparlanǵan. Bul týraly qala ákimi Erbolat Dosaev aýdan turǵyndarymen kezdesýde málimdedi.
«Sapaly ınjenerlik ınfraqurylymmen qamtamasyz etý biz úshin negizgi baǵyttardyń biri. Byltyr turǵyndardy turaqty elektr qýatymen qamtamasyz etý boıynsha jumys atqaryldy. 30 shaqyrym elektr berý jelileri aýystyryldy, 17 transformatorlyq jáne 69 taratý podstansıasy modernızasıalandy», - dedi qala basshysy.
Aýdan ákimderiniń ókilettikterin keńeıtý maqsatynda jaryq jelilerine qyzmet kórsetý jumystary ákimderdiń quzyretine berildi. Ótken jyldyń qarasha aıynda Áýezov aýdanynyń ákimdigi «Almaty Qala Jaryq» mekemesimen shart jasasty. 3 aıdyń ishinde 9,5 shaqyrym kabel jelisi aýystyryldy, 471 sham ornatyldy, 749 LED-sham aýystyryldy jáne 263 sham jóndeldi.
«Bıyl 42 shaqyrymnan astam kabel jelileri jańartylyp, 5 myńnan astam jaryq shamdaryn LED-shamdarǵa aýystyrýdy josparlap otyrmyz. Áýezov aýdanyn sapaly jaryqpen tolyq qamtý úshin osy naýryz aıynda 81 syrtqy jaryq jelisin salý úshin jobalaý-smetalyq qujattamany ázirleý bastalady», - dedi Erbolat Dosaev.