Almatyda Satpaev University stýdentteri úshin salynatyn toǵyz qabatty jańa jataqhananyń irgetasyna kapsýla salý rásimi ótti.
İs-shara memlekettik stýdentterdi jataqhanamen qamtamasyz etý baǵdarlamasy aıasynda, Qazaqstan Respýblıkasy Ǵylym jáne joǵary bilim mınıstrligine qarasty «Qarjy ortalyǵy» AQ qatysýymen uıymdastyryldy.
Saltanatty rásimge Almaty qalasy Jastar saıasaty basqarmasynyń basshysy Ázız Qajdenbek, Satpaev University basshylyǵy men belsendileri, sondaı-aq jobaǵa ınvestısıa salǵan kompanıalardyń ókilderi qatysty.
Jınalǵandar men ýnıversıtettiń ardager oqytýshylary jobanyń bastalýymen quttyqtap, stýdentterdiń jańa jataqhanaǵa josparlanǵan merzimde, ıaǵnı 2026 jyldyń basynda kóship barýyna tilek bildirdi.
- Jańa jataqhana 319 turǵyn bólmeden turady jáne 955 stýdentke arnalǵan. Toǵyz qabatty ǵımarattyń jalpy aýdany – 11 myń sharshy metrden asady, al qurylys alańy – shamamen 1 gektar. Sondaı-aq, 15 kólikke arnalǵan turaq qarastyrylǵan.
– Bul qurylys ótken jyly ashylǵan jataqhanalar salý boıynsha jobalyq keńse aıasynda júzege asyrylýda. Joba Memleket basshysynyń bes bastamasy sheńberinde iske asyrylyp, «Qarjy ortalyǵy» AQ qatysýymen sýbsıdıalanady, – dep atap ótti Jastar saıasaty basqarmasynyń basshysy Ázız Qajdenbek.
Ázız Qajdenbektiń aıtýynsha, megapolıs stýdentteri úshin jataqhana máselesi ózekti bolyp qala beredi. Bıylǵy oqý jyly bastalǵaly beri 1600 oryn ashyldy.
- Jyl sońyna deıin Almatyda jalpy sany 4500 oryndyq jańa jataqhanalar paıdalanýǵa berilmek. Salystyrmaly túrde alsaq, 2023 jyly 4000 jańa oryn ashylǵan edi, al 2025 jyly bul kórsetkish odan ári artady dep kútilýde.