Almaty ákimi: Bul - bıylǵy mereıli jyldyń mejesi bıik, mártebesi asqan, eń ulyq merekesi
Qazaqstan Respýblıkasy Táýelsizdiginiń 30 jyldyq mereıtoıyna arnalǵan saltanatty jınalysqa Baqytjan Ábdiruly qatysty, dep habarlaıdy Almaty-akshamy.kz
Almaty qalasy
Ardaqty aǵaıyn!
Qadirmendi kópshilik!
Qymbatty almatylyqtar!
Bıyl shuǵylaly shýaqqa mańdaıyn tosyp, araılap atqan árbir aq tańǵa qýana qaraǵan qazaq halqy – el Táýelsizdiginiń 30 jyldyq torqaly toıyna da at basyn buryp otyr.
Bul - bıylǵy mereıli jyldyń mejesi bıik, mártebesi asqan, eń ulyq merekesi.
Óıtkeni, olja salǵan otyz jyl – zamanaýı qazaq tarıhynyń jarqyn da jasampaz betteri qalyptasqan, ulttyq rýhymyz asqaqtap, urpaqtar sabaqtastyǵy órisin jaıyp, rýhanı órleý jyldary bolǵany aqıqat.
Sondyqtan da, alda kele jatqan Táýelsizdik kúni merekesin biz erekshe asqaq sezimmen qarsy alyp otyrmyz.
Óıtkeni, Qazaqstan Respýblıkasynyń Táýelsizdigi kúni biz úshin – memleketimizdiń myzǵymas beriktigi men tutastyǵyn, tatýlyǵy men shaıqalmas shańyraǵynyń bıiktigin dáleldeıtin uly kún!
Jumyr jerdegi qaı halyq úshin bolsa da, azattyqtan asqan uly uǵym, táýelsizdikten bıik tuǵyr joq.
Olaı bolsa, Ulttyq Táýelsizdigimiz – biz úshin de qashan da kıeli, qashan da qasterli, máni bıik, mártebesi joǵary asyl qazyna.
Aldymyzda kele jatqan bul mereıli mereke Tonykók baba zamanynan amanat bolǵan «Máńilik El» muratyna nyq qadam basyp, tabandy órkendeý baǵytyn berik ustanǵan, tamyryn tereńnen tartqan Uly Dala tósindegi qazaq eliniń baı tarıhyndaǵy eń basty oqıǵa boldy.
Al, qazaq halqy – ulan-ǵaıyr jeri bar, tamyljyǵan tabıǵaty bar, uly babalarymyzdyń at tuıaǵymen jazǵan tarlan tarıhy men urpaǵy alysqa nyq kóz tikken, baıandy bolashaǵy bar halyq.
Sondyqtan da, qazirgi tańda HHİ ǵasyrdaǵy jas Qazaq Eliniń Ulttyq ıdeıasy – Táýelsizdik tiregine aınalǵan erkin damýdyń jalpyulttyq ıdeıasymen úndesip otyr.
Óıtkeni, búgingi erkin el men azat ulttyń eń basty maqsaty – keleshegi kemel, bolashaǵy birtutas, múddesi ortaq, maqsaty aıqyn, jospary jasampaz, qundylyqtary sarqylmas, birligi bekem, tiregi myzǵymas El bolý.
Olaı bolsa, «Máńilik El» muratyna nyq qadam basyp, tabandy órkendeý baǵytyn berik ustanǵan, máńgiligin oılaǵan, úmitin úkilep, bolashaǵyna senimmen qaraǵan barsha Almaty qalasy jurtshylyǵyn – ult Táýelsizdiginiń ordaly 30 jyldyq merekesimen shyn júrekten quttyqtaımyn!
Arý Altaıdan qart Atyraýǵa, Jetisýden Saryarqaǵa deıin sozylyp jatqan Uly Dala eline – «Táýelsizdik, Erkindik, Azattyq, Bostandyq!» degen súıinshi sózderdi alǵashqy bolyp baýyryna basyp, júregine tartqan osy Almaty qalasy.
Mine, sondyqtan da, ultymyz qýanǵan, halqymyz shattanǵan Ult Táýelsizdiginiń jańa zaman, jańa dáýirdegi kindigi asqar Alataýdyń eteginde ásem Almaty qalasynda kesilgeni árbir almatylyqtar úshin árqashan da asa zor mártebe bolyp qalary aınymas shyndyq.
Ardaqty aǵaıyn!
Qazaq halqy - Ult Táýelsizdigine qol jetkizý jolynda talaı «tar jol, taıǵaq keshý» zamanyn basynan ótkizgen, attan qulasa da, taqtan qulamaǵan, ultaraqtaı jer úshin jaýymen jaǵa jyrtysqan, sertine adal, kıesi mol, nebir bahadúr batyrlar men beren bıler shyqqan tekti halyq.
Bul - tarıhı shyndyq.
Al, búginde sol Qazaq eli keshegi tórde otyryp ádil tórelik aıtqan danyshpan Tóle bı baba tebirene aıtqandaı, «kósile shabar jeri bar, qol bolarlyq eli bar» kıeli mekenge aınaldy.
Osylaısha, babalar salǵan sara jol babalar ańsap, úkili arman otyn jaqqan búgingi Táýelsiz el bolý baqytyna ulasty.
Bul kún – peıili daladaı darhan, birligi bolattaı berik, tamyry tereń, qazyǵy qaıtpas, zeńgir kókke Kók Týyn kótergen shabysy tulpardaı alyp halqymyzdyń mereıli kúni.
Bul kún – halqymyz úshin eleýli, memleketimiz úshin aıshyqty kún!
Bul kún – ár qazaqtyń júregine shýaq shashyp, kóńiliniń tórine máńgilik mazdatyp ot jaqqan kún.
Bul kún – dúnıe júzine qazaq deıtin ulttyń táýelsiz elin, derbes memleketin jarıa etken kún.
Bul kún – urpaǵymyz boıyn, azamattarymyz oıyn túzeıtin jasampaz kún.
Bul kúni – ultymyzdyń myńjyldyq asyl armany oryndalǵan qasterli kún.
Al, búginde sol jaısań eldiń, tar jerde tabysyp, keń jerde kelise bilgen kóp ultty tatý halyqtyń ortaq Otany, berik shańyraǵy, myqty tabaldyryǵy men ulan urpaqtyń jyly orny, ystyq uıasy bar. Ol - árıne, jańa dáýirdiń kún shýaǵymen jarysqan Táýelsiz Qazaqstan
Mine, sol bereke men birliktiń aq jalaýyn kók aspanda jelbiretip, eńbek pen dostyqtyń saıyn dalada kúıin shertip ótken jasampaz 30 jyl barsha qazaqstandyqtar úshin ǵasyrǵa bergisiz jyldarǵa aınaldy.
Sondaı-aq, urpaǵyn terbetken Ult Táýelsizdigi ultymyzdyń altyn besigine, halqymyzdyń eń qasterli, eń qasıetti, baǵa jetpes bıigine kóterildi.
Jumyr jer betinde el bolǵanmen, baǵdary joq, baǵdary bolsa da, berekesi joq, tabysqa keneler tabandy tirligi joq, synǵa shydar salmaǵy joq memleket qanshama?
Bul - ashshy shyndyqtyń aınasy! Ol - ómir fılosofıasy, tabıǵat zańdylyǵy.
Qazirgi tańda qyspaqtyń qarańǵysynan jaryqqa jarqyrap shyqqandaı bolǵan jas Qazaq eli tórteýi túgel, altaýy aman, bary berekeli, yrysy qýatty el bolyp, tórtkúl dúnıe dıdarynda daralanyp otyr.
Qajet bolsa, saıyn dalanyń sáıgúligindeı bolǵan Qazaqstan jahandyq damý kóshine ilese shapqan elder qatarynan sýyryla alǵa shyǵyp, kósh tizginin ustaǵan kórkemder sanatyna bet aldy. Óıtkeni, Ult Táýelsizdigi bar qazaqtyń kıe qonǵan Táńirtaýy, shyńyna kóz jetpes aqbas Alataýy, qınalǵan qazaqqa pana bolǵan qart Qarataýy sıaqty.
Qymbatty almatylyqtar!
Al, Ult Táýelsizdigi osy 30 jylda ult pen urpaqtyń sanasyna uly ózgerister men tyń serpin, irgeli silkinister ákelgeni tarıhı shyndyq! Sondyqtan da, bul tamyryn tereńnen tartqan Uly Dala tósindegi qazaq eliniń baı tarıhyndaǵy eń basty oqıǵa boldy.
Táýelsizdikpen birge tynystaǵan biz osy jyldary eldik dástúr men memlekettik mádenıetti, rýhy bıik rýhanıat pen qajyrly eńbek úlgisin qalyptastyrdyq.
Búginde tórtkúl dúnıede beıbit kúndi jaqtaǵan Táýelsiz Qazaqstan memleketiniń pikirimen sanaspaıtyn, baǵaly bastamasyna qulaq túrmeıtin, ortaǵa salǵan ordaly oıymen kelispeıtin el joq dep sanaýǵa bolady. Dostyqqa berik, kórshige adal peıilimen erekshe qurmetke ıe bolyp otyr.
Osyndaı eleýli iste jáne Ult Táýelsizdigin nyǵaıtý maqsatynda ótkenimizdi saralap, keshegimizge qarap, erteńimizge kóz tastaǵan Elbasy, Qazaqstannyń Tuńǵysh Prezıdenti Nurnsultan Ábishuly Nazarbaevtyń eńbegi aıryqsha qurmetke ıe.
Dáýir saıasatynyń darabozy, Elbasy Nursultan Ábishuly Nazarbaevtyń «Qazaqstan Respýblıkasynyń Táýelsizdigi – Máńgilik Eldiń uly tarıhymen sabaqtas, qazaq halqynyń taǵdyrymen tamyrlas» degen qanatty sózi búginde barsha otandastarymyz úshin jaýhar ómirdiń, tynysh kúnniń, beıbit zamannyń baǵdarshamyna aınaldy.
Al, Memleket basshysy Qasym-Jomart Kemeluly Toqaev óziniń sońǵy Joldaýynda «Qazir bizge Táýelsizdiktiń jetistikterin eselep, elimizdi damýdyń jańa sapaly kezeńine shyǵarý múmkindigi berilip otyr» dep aldaǵy tynymsyz tirlikterge keń jol ashyp otyr.
Sondyqtan da, Táýelsizdiktiń quny tereń, baǵasy qymbat. Óıtkeni, biz - tarıhy tereń, shejiresi sheksiz halyqtyń urpaǵymyz.
Osy jyldary biz saıyn dalasyn at tuıaǵymen dúbirletken dańqty babalarymyzdyń «Máńgilik El» muratyn jańǵyrttyq, jibek jipteı jalǵasqan urpaqtar sabaqtastyǵyn qaıta jalǵadyq.
Sondyqtan da osyndaı ıgi isterdiń nátıjesinde barsha qazaqstandyqtar úshin artta qalǵan otyz jylda ult tizginin qolyna alyp, elimizdi barlyq qıyndyqtardan «tasqa urmaı, jaǵaǵa soqpaı» alyp shyqqan uly saıasatker Elbasy men babalar armanyna aınalǵan Uly Táýelsizdik uǵymdary ajyramas bir bútinge aınalǵany aqıqat.
Óıtkeni, erkin eldiń, azat ulttyń baǵyna týǵan kemeńger uly Nursultan Ábishuly – jas Qazaq memleketiniń jańa dáýirdegi negizin qalap, irgesin bekitip, shańyraǵyn kóterip, úkili kóshin túzý alyp júrý mısıasy mańdaıyna buıyrǵan biregeı tulǵa.
Bul - tasada qalmaıtyn tarıhı shyndyq.
Ardaqty aǵaıyn!
Qymbatty kópshilik!
Men búgingi saltanatty basqosýda osy artta qalǵan otyz jyldyń ishinde ásem de sulý Almaty qalasynyń Ult Táýelsizdigi jolyndaǵy orny men mańyzyna erekshe kóńil aýdarǵym kelip otyr.
Sol tustaǵy týǵan Otanymyzdyń júregi - Almaty qalasynyń eń basty óshpes tarıhı qundylyǵy – 1991 jyldyń 16 jeltoqsanynda osynda Qazaqstan Respýblıkasynyń egemendi el ekendigin resmı túrde jarıalanǵandyǵy dep esepteımin.
Almaty – Ult Táýelsizdiginiń kók baıraǵy tuńǵysh jelbiregen qala.
Sonymen qatar, almaly astananyń tórinde elimiz ben ultymyz úshin mártebesi bıik birneshe asa mańyzdy qujattar qabyldandy.
Olardyń aldyńǵy qatarynda qabyldanǵan «Memlekettiń egemendigi týraly deklarasıa», «Qazaqstan Respýblıkasynyń memlekettik táýelsizdigi týraly» Konstıtýsıalyq zańy, elimizdiń Konstıtýsıasy, memlekettik rámizderdi bekitý, Qarýly Kúshterdi qurý, ulttyq valútany engizý sıaqty máni joǵary sheshimder Almaty qalasynda júzege asty.
Qazaqstan Respýblıkasynyń Tuńǵysh Prezıdentiniń jalpyhalyqtyq saılaýynyń qorytyndy nátıjesi de osy bizdiń Almatydan jahanǵa tarap edi.
Týra dál osy zalda osydan 30 jyl buryn elimizdiń Tuńǵysh Prezıdenti, Elbasy Nursultan Ábishuly Nazarbaev 1991 jylǵy 10 jeltoqsanda ant qabyldaǵan sátin kózi kórgen aldyńǵy býyn ókilderi úlken tolǵanyspen eske alady.
Sonymen qatar, 1998 jyly Elbasy qol qoıǵan «Almaty qalasynyń erekshe mártebesi týraly» zańdy aıryqsha aıtýǵa bolady!
Al, Arqaǵa bet alǵan alǵashqy qońyraýly kósh te osy asqaq Alataý baýraıynan bastalǵany barshyńyzǵa málim.
Elbasy osyndaı sátterdi kóńil kókjıegin bıikke ushyra otyryp, «Almaty – Táýelsizdiktiń altyn besigi!» dep, qalamyzdyń tarıhı baǵasyn tasqa basyp, ádil ornyn erekshe baǵalaǵanyn barsha almatylyqtar búginge deıin asa zor maqtanyshpen eske alady.
Óıtkeni sol jyldary ultymyzdyń ulylary meken etken, ult bostandyǵy jolynda bel sheship kúresken Alash ardaqtylarynyń taban izi qalǵan, qazaq zıalylarynyń orny ózgermegen arý Almaty – qazaq dalasyndaǵy eń mártebeli mádenı, eń qasterli rýhanı jáne saıası ordaǵa aınalǵan eń iri shahar edi.
Sondaı-aq, qudireti kúshti Jaratýshynyń nur-shapaǵaty túsken Jetisýdyń súmbilesindeı sulý Almatynyń barsha qandastarymyzdyń mereıi men namysy ekenine daý joq.
Al, búgingi erke Esildiń jaǵasyna qazyǵyn qaqqan jańa elordamyz Nursultan qalasy – elimizdiń baǵy bolsa, zamanaýı damyǵan megapolıs deńgeıine kóterilgen Almaty – qut-berekesi.
Sondyqtan da, barsha qazaqstandyqtar búginde elordasymen maqtanyp, Almatysymen marqaıady.
Esildiń boıyndaǵy ǵalamat qala da, Alataýdyń etegindegi sulý shahar da súıýge, saǵynýǵa laıyq.
Táýelsiz Qazaqstanda osy eki qalany tań nuryndaı, azat oıdyń tunyǵyndaı aýyzǵa alyp, shyn júrekten erekshelendirip aıtýymyzdyń osyndaı óz joralǵysy bar.
Sebebi Qazaq eliniń ǵasyrlar boıǵy ańsaǵan armanynyń ońynan oryndalǵanyn aıǵaqtaıtyn ǵalamattar bar.
Táýelsizdik týraly sóz bolǵan tusta, biz 1986 jylǵy Jeltoqsan oqıǵasyn aınalyp óte almaımyz.
Osy oraıda Memleket basshysy Q.K.Toqaev «1986 jyly órimdeı ul-qyzdarymyz Keńes Odaǵynyń qaharynan qaımyqpaı, ult namysy úshin alańǵa shyqty. Osy kúnnen soń týra bes jyl ótkende Táýelsizdigimizdi jarıalaýymyzdyń sımvoldyq máni zor» dep atap ótkenin jaqsy bilemiz.
Sol azattyqtyń alǵashqy qarlyǵashtary – Jeltoqsan qaharmandary da búgin ortamyzda otyr.
Al, Qazaqstannyń Tuńǵysh Prezıdenti, Elbasy Nursultan Ábishuly Nazarbaev óziniń jaqyn kúnde jarıalaǵan «Táýelsizdik taǵylymy» degen tarıhı maqalasynda «Osydan otyz jyl buryn biz sanaly túrde, óz dúnıetanymymyz ben bolmysymyzdyń negizi retinde bostandyq pen azattyqqa tańdaý jasadyq» degen bolatyn.
Almaty qalasy táýelsizdiktiń uly bastaýlary men jańa qundylyqtaryn altyn besiginde aıalap, alaqanynda terbedi.
Osynyń barlyǵy Almatynyń halqy erjúrek, táýekelshildiginen jáne Alataýdyń shyrqaý bıik shyńdaryna qarap ómir súrgendikten shyǵar!
Mártebeń ósip, qaraıtyn asqar bıigińniń bolǵany qandaı baqyt!
Búginde ekonomıkasy nyǵaıǵan, óndirisi órkendegen, rýhanıaty órlegen, kásipkerligi damı túsken, ǵylymy qanat qaqqan, jastardyń qalasy Almatynyń Ult Táýelsizdigin tuǵyryn nyǵaıtý jolynda eńbek ete bereri sózsiz.
Osyndaı uly isterdi iske asyrýda barsha qazaqstandyqtar sıaqty almatylyqtardyń da úlesi eren.
Al, Otanymyzdyń halqy ózderi haq turatyn eldik bıiktikti egemen Qazaqstannyń órkenıettilik jolynan kóredi. Elin súıgen Elbasy óz elin Z0 jylda qanattyǵa qaqtyrmaı, tumsyqtyǵa shoqyttyrmaı, qaıranǵa qaldyrmaı, álemdik órkenıettiń aldyńǵy shebine, dúnıedegi eń damyǵan 40 eldiń qataryna qosty.
Elbasynyń bul teńdessiz tarıhı eńbegine san urpaq áli-aq zor qurmetpen aıtatyn bolady.
Eli súıgen Elbasyna osynaý mereıtoı qarsańynda sheksiz razylyq sezimimizdi sizderdiń attaryńyzdan aıtýǵa ruqsat etińizder!
Qadiri bıik qala turǵyndary!
Tirlikti birlikten izdegen qazaq halqyna uly babalardan qalǵan «Yntymaq qaıda barasyń, bereke-birlikke baramyn» degen ataly sózi aldaǵy ómirimizdiń ulaǵatty urany bolary aqıqat.
Dóńgelegen dúnıe tek qana zymyraǵan ýaqytqa ǵana táýeldi eken. Al, darıa ýaqyt, darhan mezgil araılap atqan Azattyqtyń aq tańymen qazaq halqyna ólsheýsiz qyzmet etýde.
Biz baǵalaı bilgen qasterli ýaqyttyń baǵasy da osynda.
Sonymen qatar, moınymyzda babalardyń san ǵasyrlyq uly kóshin keleshekke ozdyrý amanaty taǵy bar.
Mine, sondyqtan da, bizge qashan da qýat beretin, alǵa jeteleıtin bizdiń eń basty qundylyǵymyz – ol Otanymyz, Táýelsiz Qazaqstan eshkimge kúmán keltirmesi anyq.
Al, osy otyz jylda Táýelsizdik bizge ne berdi desek, Táýelsizdik oıǵa erkindik berdi.
Táýelsizdik ezilgen eńseni tikteýge múmkindik berdi.
Táýelsizdik ózge eldermen terezemizdi teńestirdi.
Táýelsizdik derbes damý jolymyzdy óz qolymyzǵa ustatty.
Óıtkeni, osy asýlardan alqynbaǵan Ult Táýelsizdigi tutas ultqa qanat bitirip, erkin eldiń qaryshty qadamyn ashyp, jazıra kóńilin kókke kóterip, jarqyn da jasampaz bolashyǵyna dańǵyl jol ashty.
Olaı bolsa, biz keleshekte bilimi tereń, parasaty mol, rýhanı baı, memleket basqarý isine jetik, óndiristi jandandyra alatyn, patrıottyq rýhtaǵy jastarymyzdy tárbıeleýimiz qajet.
Otan úshin janyn beretin jas urpaqtardy tárbıeleı alsaq, Qazaqstannyń taǵdyry men bolashaǵy aldaǵy myńjyldyqtarǵa tamyr jaıary sózsiz.
Qabyrǵasy qatpaǵan jas memlekettiń aldynda Táýelsizdik syılaǵan osyndaı dańǵyl da dara joly jatyr.
Ol joldan ótý úshin áli alýan asýlardan asý, kedergili ótkelderden ótý mindetteri tur.
Mine, sondyqtan Táýelsizdik – bastaǵy baqyttyń baǵasyn baıyptaı bilýge jeteleıtin ulaǵatty uǵym. Al, Táýelsizdikti baıandy etý – bizdiń basty muratymyz. Osy oraıy kelgen otyz jylda Qazaqstan tamyryn tereńge jaıǵan, alyp Báıteregi búrshik atqan, Samuryq qusy qolyna qonǵan ult bıigine kóterildi.
Al, Azattyqtyń anasy – bostandyq bolsa, Táýelsizdiktiń anasy – erkindik ekeni barshaǵa málim.
Osylaısha, Kúltegin babadan qalǵan órkenıettiń ónegesi ǵasyrlardan joǵalmaı, ulysyna jetti. Qazaq dalasy Uly Túrki áleminiń qara shańyraǵyna aınaldy.
Halqymyzda «Baqyt baǵalaǵannyń basynda turady» degen dana sóz bar. Olaı bolsa, baqytymyzdy baǵalap, Táýelsizdigimizdi tuǵyrlandyra, erkindigimizdi túrlendire túseıik, ardaqty aǵaıyn.
Búginde ata-babadan mıras bolǵan baıtaq ólkede oryn tepken Qazaqstan Respýblıkasy ejelden amanat bolǵan uly isterdiń, qasıetti tildiń, ulaǵatty salt-dástúrdiń, irgeli memlekettiń zańdy murageri bolyp sanalady.
Sondyqtan, babalarymyz tiri bolý úshin bir bolsa, biz iri bolý úshin bir bolýymyz kerek ekendigin eshqashan esten shyǵarmaıyq.
Óıtkeni, Táýelsizdikke deıin biz keshpegen taıǵaq, biz ótpegen soqpaq joq. Endigi jerdegi tirligimiz oń, jolymyz túzý bolǵaı! Túzý jolda kóshimiz kólikti, basymyz erikti, maqsatymyz tabysty bolsyn!
Olaı bolsa, Táýelsizdiktiń qaınar bulaǵy sarqymasyn, ultymyzdyń jigeri muqalmasyn, yntymaq pen birliktiń qanaty qaıyrylmasyn, shybyqtaı ıilgen jas urpaq ata-baba jaǵyp ketken ottyń alaýyn sóndirmesin!
Ótken sara tarıhyn oqıtyn, dara salt-dástúrin joǵaltpas, ádebıeti men mádenıetin izdeıtin, salamatty da sanaly ómirge qushtar ultjandy jastarymyz kóp bolsyn!
Osyndaı ultymyzdyń uly qundylyqtary men baı muralaryn erteńgi el ıesi bolar jastarymyz osyny jadynda saqtasa deımin.
Óıtkeni, ata-baba amanatyn oryndaý - sol jalyndy jastarymyzdyń ıyǵyna túser asa úlken jaýapty júk. Keshegi Alash arystary aramandaǵan azattyq tańy urpaǵyna shuǵylaly shýaǵyn shasha bersin!
Bizdiń uly mindetimiz búgingi qoǵam men jastarǵa osy ult pen halyq aldyndaǵy uly jaýapkershiligin keńinen nasqıhattaýmen erekshelenbek.
Bizdiń aǵa býyn ardager aǵalarymyz keshegi qan maıdanda qol bastap, elin qorǵasa, búgingi beıbit kúnde jol bastap, egemen elin kórkeıtýge orasan zor úles qosyp keledi.
Sol úshin de biz olarǵa árdaıym raqmet aıtamyz.
Sondaı-aq, birlik pen tatýylyqtyń tiregine aınalǵan túrli etnos ókilderiniń qajymas tirlikterine alǵys bildirgim keledi!
Osynyń barlyǵy - búgingi «Máńgilik El» qaqpasynan attaǵan egemen elimiz úshin synaptaı syrǵyǵan qas-qaǵym sát, memleket bolyp qalyptasýdyń ordaly otyz shyńy, kóz tastar otyz belesi ǵana.
Búginde jelmen jarysqan, qustan júırik ordaly otyz jyldyń osylaısha tań shapaǵy men kún shýaǵynyń ǵajaıyp keremetin patsha kóńil kıeli halqy men mańdaıyna úki taqqan ulaǵatty urpaǵy tósine basty.
Al, qyzyl sózdiń qyrmanyn kúnde qýyryp, kúbisin kúnde sapyra bergennen eshkim mol qazyna men yrys-dáýletti, berekeli birlik pen orasan ıgilikti syrttan ákep bermeıdi.
Ony túsingen jón, bilgen abzal! Al, Ult Táýelsizdigin kózdiń qarashyǵyndaı saqtaý - árbir qandasymyzdyń paryzy, jas jelken jastarymyzdyń mindeti dep sanaımyn.
Óıtkeni, Táýelsizdik ultymen qadirli, urpaǵymen mártebeli.
Sózimdi qorytyndylaı kele, týǵan Otanymyz – Qazaqstan Respýblıkasynyń Táýelsizdigi tuǵyrly, bolashaǵy baıandy, keleshegi kemel bolsyn, ardaqty aǵaıyn.
Barsha Almaty qalasy jurtshylyǵyn taǵy da el Táýelsizdiginiń 30 jyldyq mereıli merekesimen shyn júrekten quttyqtaımyn!
Ulttyq saıasattyń nurly nárimen jigerlengen, yntymaǵy men dostyǵy jarasqan, elimizdiń baǵyn asyratyn, mereıin tasytatyn uly isterińizge sáttilik tileımin!
Otbastaryńyzǵa amandyq, denderińizge saýlyq, baqytty ómir tileımin.
Mereıimiz ústem, tilegimiz qabyl bolsyn!
Mereke merekege ulassyn, qymbatty almatylyqtar!
Týǵan Otanymyz – Qazaqstan jasaı bersin!
Zeıin qoıyp tyńdaǵandaryńyzǵa raqmet!