Shopan qala mańynan qarý-jaraq pen arnaıy oq-dáriler jasyrylǵan jerdi taýyp aldy
Alataý aýdandyq polısıa basqarmasynyń qyzmetkerleri áskerı oq ótkizbeıtin keýdeshe, kaska, travmatıkalyq tapansha men ondaǵan patron tapty, dep habarlaıdy Almaty-akshamy.kz QazAqparat saıtyna silteme jasap.
«Bizdiń bólimshege Ý. esimdi azamat habarlasyp, «Darhan» yqshamaýdanyndaǵy saıda mal baǵyp júrgen kezinde qarý-jaraq arsenalyn taýyp alǵanyn aıtty. Aqparat rastaldy. Jedel tergeý toby kaska, oq ótkizbeıtin keýdeshe, Kalashnıkov avtomatynan patronsalǵysh, 7,62 mm kalıbrli 20 patron, «Beretta» travmatıkalyq tapanshasy, rezeńke taıaqshalar, «Makarov» tapanshasynan 19 patron jáne belgisiz travmatıkalyq tapansha tapty», – dedi Alataý aýdandyq polısıa basqarmasynyń bastyǵy İlıas Ómirserikov.
Onyń aıtýynsha, tabylǵan arsenaldyń menshik quqyǵy men qaıdan alynǵany odan arǵy tekserý barysynda anyqtalady.
«Arsenaldy jasyrǵan tulǵalar anyqtalyp, jaýapqa tartylady», - dedi ol.
