«Jańa Almaty» keshendi damý jospary aıasynda qalada túrli salada aýqymdy jumys bastalyp ketti, dep habarlaıdy Almaty-akshamy.kz Almaty.tv-ǵa silteme jasap.
Búginde qalanyń 99 paıyzy gazben qamtylǵan. Al jeke sektordaǵy 1943 turǵyn úı áli kúnge deıin pesh jaǵady. Másele aldaǵy ýaqytta «Jańa Almaty» keshendi damý jospary aıasynda sheshimin tappaq. Osylaısha, kómirden arylyp, qalany tolyqtaı kógildir otynmen qamtý kózdelip otyr. Odan bólek, turǵyndardy jaryqtandyrý jáne sapaly elektr energıasymen qamtý da basty másele.
Kúndiz Almaty qandaı kórkem bolsa, túngi qala tipti ajarly. Qala kóshelerinde janyp turǵan barlyq shamdardy «Almaty qala jaryq» mekemesi baqylaıdy. Mamandardyń habarlaýynsha, qazir shaharda 165 myń jaryqtandyrǵysh bar. Qazir olar energıa únemdegish lampalarǵa kóshken. Sapa – birinshi orynda. Ári naryqta bul taýarǵa suranys joǵary.
«Led shamdardyń tıimdiligi joǵary. Onyń jaryq berý qýaty burynǵyǵa qaraǵanda áldeqaıda sapaly, ári enerıany únemdeıdi. Nátıjesinde elektr tutyný ortasha eseppen 19,2%-ǵa tómendeıdi dep boljap otyrmyz», – dedi energetık Ámze Ákimjanov.
Qalanyń shetki aýdandarynda jalpy uzyndyǵy 200 shaqyrym bolatyn kóshede jaryq jelileri kúrdeli jóndeýden ótip jatyr. Nátıjesinde 68 myń turǵyn sapaly elektr energıasymen qamtylady. Aýdan turǵyndarynyń kópshiligi toqty úıdi-úıge kórshi-qolań men jaqyn jerdegi transformatordan ózderi qosyp alatyn kórinedi. Bul jaǵdaıda tehnıkalyq normalar saqtalmaıdy, saldary asa qaýipti deıdi mamandar.
«Osyndaı jeke sektordaǵy turǵyn úılerdi qala balansyna ótkizý - basty talap. Bul aýdan turǵyndary úshin jáne biz úshin de óte qolaıly bolmaq. Sebebi úılerdegi jaryqtardyń júıesi retteledi, sonymen birge olardyń bári bizdiń baqylaýymyzda bolady, ıaǵnı bir bazada saqtalady. Sáıkesinshe jaryq sapasy da arta túsedi», – dedi «Alataý jaryq kompanıasy» AQ basqarma bastyǵy Dmıtrıı Hlybov.
Gazben qamtý, elektr energıasy men jylý júıesi. Munyń bári de áleýmettik saladaǵy basym baǵyttar. Qazir qalanyń shetki aýdandary sanalatyn Naýryzbaı, Alataý, Túrksibte bul máseleler kezek kúttirmeı sheshilýi kerek. Maqsat – ol aýdandarǵa qalanyń ortalyǵyndaǵydaı jaǵdaı jasaý.
«Almaty bas josparymen birge «Shetsiz qala» jobasy da aýqymdy júzege asyp keledi. Taǵy bir erekshelik – qandaı jospar qursaq ta, turǵyndarmen tildesemiz, olardyń oıyn tyńdaımyz. Bul bılik pen buqara arasyndaǵy alshaqtyqty joıýǵa múmkindik beredi», – dedi «Almatybasjospar» ǴZI ınjeneri Gúlnar Nahmetova.
«Jańa Almaty» keshendi damý jospary aıasynda qalada túrli salada aýqymdy jumys bastalyp ketti. Maqsat – qala halqy úshin jaıly orta qalyptastyrý, ómir súrý deńgeıin arttyrý jáne qalany kórkeıtý. Biraq, eskeretin jaıt, qala kelbeti men tarıhı estetıkasyn saqtap qalý asa mańyzdy.