Lıtvada qazaqtyń dástúrli oıyny toǵyzqumalaqtyń tanymaldylyǵy ósýde.
Lıtvanyń astanasynda Baltyq óńirindegi alǵashqy toǵyzqumalaq federasıasy ashyldy, dep habarlady Almaty-akshamy.kz Baq.kz-ke silteme jasap.
Toǵyzqumalaq federasıasyn tirkegender Lıtvada qazaqtyń ulttyq oıynyn nasıhattap júrgen erli-zaıyptylar: Aıdas Jandarıs jáne Ramýte Jandarıene.
Birneshe jyldan beri Qazaqstannyń Lıtvadaǵy Elshiligi Dúnıejúzilik toǵyzqumalaq federasıasymen jáne lıtvalyq seriktestermen yntymaqtasa otyryp, atalǵan elde qazaqtyń zıatkerlik oıynyn tanystyrý boıynsha tynymsyz jumys júrgizip keledi.
Lıtvalyq oqýshylar men stýdentterge toǵyzqumalaq oıynynyń qyr-syryn úıretetin sheberlik sabaqtary turaqty túrde ótip turady.
2019 jyly A. Jandarıs pen R. Jandarıene Qazaqstan Elshiligimen jáne dúnıejúzilik federasıamen birlesip, alǵash ret lıtva tilinde oınaýǵa arnalǵan ádistemelik qural shyǵaryp, ony «Mektep» iri aımaqtyq kórmesinde pash etken.
Kóne oıyn Lıtvada belsendi damyp keledi jáne jankúıerlerin jaýlap alýda. Lıtvada osy kúnge deıin toǵyzqumalaqtan 2 jarys ótti.
Qyzyǵýshylyq tanytqandar Qazaqstanda jasalǵan taqtalardy Vılnústiń eski qalasynyń dál ortalyǵynda, Jandarıstardyń kitap dúkeninen satyp ala alady.
Federasıa quryltaıshylary onyń ashylýyn Qazaqstan Respýblıkasy táýelsizdiginiń 30 jyldyǵyna arnap, oıyndy ary qaraı damytyp qana qoımaı, jaqyn arada Qazaqstandaǵy oıyn sheberlerine eleýli básekelestik jasaýdy josparlap otyr.
Aıta ketsek, 2020 jyldyń jeltoqsanynda Qazaqstan, Qyrǵyzstan men Túrkıanyń ortaq usynysynyń negizinde IýNESKO toǵyzqumalaq oıynyn Adamzattyń materıaldyq emes mádenı muranyń reprezentatıvtik tizimine qosty.