“Ózbekstandaǵy Qazaqstan medısınasynyń kúnderi” aıasynda Qazaqstan kardıologıa jáne ishki aýrýlar ǵylymı-zertteý ınstıtýtynyń endoskopıa jáne ıntervensıalyq gastroenterologıa bólimshesiniń meńgerýshisi Alma Habıjanova men dáriger-endoskopıst Qanat Seıtbekov Tashkenttegi klınıkalardyń mamandaryna sheberlik sabaqtaryn ótkizdi, - dep habarlaıdy Aqshamnews.kz.
İs-shara barysynda olar ishek qabyný aýrýlaryn dıagnostıkalaýdyń zamanaýı ádisteri (balondy enteroskopıa, vıdeokapsýlalyq endoskopıa jáne endoýltradybystyq zertteýler) boıynsha ǴZI jetistikterin tanystyrdy.
Qazaqstandyq endoskopıster «İshek qabyný aýrýlarynda endoskopıanyń róli» taqyrybynda «M-Clinic» medısınalyq ortalyǵynyń endoskopıst-dárigerleri men gastroenterologtary úshin dárister oqydy. Sheberlik sabaǵy aıasynda ishek qabyný aýrýlaryn dıagnostıkalaýdyń zamanaýı tásilderi usynylyp, klınıkalyq jaǵdaılar men endoskopıalyq baqylaý algorıtmderi talqylandy. Dıagnostıkanyń naqtylyǵyn arttyrý jáne ınovasıalyq endoskopıalyq tehnologıalardy engizýge erekshe nazar aýdaryldy.
Sonymen qatar, ózbek áriptesterimen endoskopıalyq zertteýlerdi standarttaý, kabınetterdi jabdyqtaý jáne mamandardyń daıyndyǵynyń sapasyn arttyrý máseleleri boıynsha kásibı pikirtalastar ótti. Birlesken ǵylymı-tájirıbelik is-sharalar uıymdastyrý, tájirıbe almasý jáne Qazaqstan men Ózbekstan arasyndaǵy halyqaralyq áriptestikti damytý máseleleri talqylandy.