Almatyda mektepke deıingi balalar mekemelerinde ujymdyq ımýnıtettiń saqtalýyna baqylaý kúsheıtildi. Bul týraly ÓKQ alańynda Almaty qalasy Sanıtarlyq-epıdemıologıalyq baqylaý departamentiniń asa qaýipti ınfeksıalar men týberkýlezdi epıdemıologıalyq qadaǵalaý bóliminiń basshysy Jaıdarkúl Otarbekova aıtyp berdi, dep habarlaıdy aqshamnews.kz
Onyń aıtýynsha, ótken jyly qyzylsha aýrýynyń jaǵdaılary 200 mektepke deıingi balalar mekemelerinde tirkeldi. Barlyǵy 248 bala naýqastandy. Negizgi sebebi - vaksınasıamen qamtýdyń tómen deńgeıi.
Bul jaǵdaıdyń sebebi mektepke deıingi uıymdarǵa baratyn balalarda vaksınasıanyń bolmaýy bolyp tabyldy. Mundaı jaǵdaı uıymdasqan balalar ujymdarynda ártúrli vaksınamen basqarylatyn ınfeksıalardyń toptyq, órshýine ákelýi múmkin, bul 2023 jyly qyzylsha aýrýynyń órshýin kórsetti», - de atap ótti J.Otarbekova.
Osyǵan baılanysty, qalanyń sanıtarıalyq-epıdemıologıalyq qyzmeti balabaqshalarda ujymdyq ımýnıtettiń saqtalýyna baqylaýdy kúsheıtti. Qalanyń 870 mektepke deıingi balalar mekemesine jospardan tys tekserýler júrgizildi, onyń nátıjesi boıynsha 157 hattama jasaldy.
Sonymen qatar, ata-analar men balabaqsha qyzmetkerleriniń vaksınasıanyń mańyzdylyǵy týraly habardarlyǵyn arttyrý úshin semınarlar, dárister ótkizilip, áńgimelesýler júrgizildi. Áleýmettik jelilerdegi aqparattyq naýqan da jandandy.
«Ata-analarmen jáne mektepke deıingi mekeme qyzmetkerlerimen 278 ret áńgime júrgizilip, qalanyń aýdan ákimdikterinde vedomstvoaralyq komısıanyń 10 otyrysy ótkizildi, mektepke deıingi mekemede tabyn ımýnıtetiniń saqtalmaýy boıynsha aýdandyq bilim bólimderine 11 hat daıyndaldy, «Facebook», «Instagram» áleýmettik jelilerde qaladaǵy epıdemıologıalyq jaǵdaı jáne vaksınasıanyń mańyzdylyǵy, sondaı-aq profılaktıkalyq ekpelerden bas tartýdyń saldary týraly 90 aqparat ornalastyryldy», - dep atap ótti ol.
Qorytyndylaı kele, ÓKQ spıkeri ata-analardy balalaryn vaksınasıalaý máselesine jaýapkershilikpen qaraýǵa jáne vaksınasıa kúntizbesin saqtaýǵa shaqyrdy.