Qazaqstan áskeriniń tyl bólimsheleri 1992 jyly quryldy. Oǵan Qarýly kúshterdiń áskerı bólimderi men mekemelerin tamaq ónimderimen, zattaı múlikpen, janar-jaǵarmaımen jáne tehnologıalyq jabdyqtarmen jaraqtandyrý mindetteri júktelgen.
30 jyldan astam ýaqyt tyl mamandarynyń kúshimen áskerlerdiń kúndelikti, oqý, jaýyngerlik ómirin uıymdastyrý jáne olardy jaýyngerlik qabiletti kúıde ustaý úshin qajetti qamtamasyz etý júıesi quryldy dep senimmen aıtýǵa bolady.
Salany jetildirý jumystary jalǵasý ústinde. Bul Qarýly kúshter túrleriniń bas qolbasshylaryna, óńirlik qolbasshylyq áskerleriniń qolbasshylaryna áskerı bólimder arasynda materıaldyq quraldardy bólý quqyǵyn berý arqyly áskerlerdi materıaldyq quraldarmen qamtamasyz etý tártibin ońtaılandyrýdan turady. Bul tásil áskerlerdiń erekshelikterin eskere otyryp, avtonomdy, jedel áreket etýge múmkindik beredi.
Shet elderdiń ozyq tájirıbesin eskere otyryp, kıim-keshekpen qamtamasyz etý sheńberinde kıimniń, aıaq kıimniń jáne kıim-keshektiń áskerı nysanyna qoıylatyn jańa talaptar ázirlendi.
Qazirgi ýaqytta el Prezıdentiniń tapsyrmasy boıynsha Qarýly kúshterdiń Tyly Qarýly kúshterdiń, basqa da áskerler men áskerı quralymdardyń barlyq áskerı qyzmetshileri úshin dalalyq kıim nysanyn birkelkilikke keltirý boıynsha jumys júrgizýde, dep habarlaıdy aqshamnews.kz Qorǵanys mınıstrligine silteme jasap.
Basym máselelerdiń qataryna merzimdi qyzmet sarbazdarynyń tamaqtanýyn uıymdastyrý jáne azyq-túlik rasıonynyń normalaryn saqtaý kiredi. Áskerı qyzmetshilerdiń azyq-túlik rasıony Qazaq tamaqtaný akademıasynyń ǵylymı usynystaryna negizdelgen jáne 80-nen astam ónim men sýsyndardy qamtıdy.
Áskerlerdi materıaldyq qamtamasyz etý máselelerin keshendi sheshý tyl áskerı ujymdarynyń úılesimdi, aıqyn jáne birqalypty jumysynyń arqasynda júzege asyrylyp keledi. Áskerı qyzmetshiler jyl saıyn oqý-jattyǵý jıyndary barysynda ásker bólimshelerin úzdiksiz jabdyqtaýdy jáne materıaldyq qajettilikterdi qanaǵattandyrýdy uıymdastyrýdyń jańa tásilderi men daǵdylaryn shyńdaýda. Olar ózderiniń joǵary kásibıligin "Eshelon", "Birlestik-2024" sıaqty halyqaralyq jáne respýblıkalyq oqý-jattyǵýlar barysynda birneshe ret dáleldedi.
Qazirgi tyl mamandary aldyńǵy býynnyń dańqty dástúrlerin abyroımen jalǵastyrýda jáne Qarýly kúshter bólimshelerin ýaqtyly ári tolyq qamtamasyz etý tapsyrmalaryn abyroımen oryndap keledi.