Almaty qalalyq Azamattyq alánsy Turaqty damý maqsattary (TDM) boıynsha qoǵamdyq monıtorıń ortalyǵyn iske qosty.
Ortalyq úkimettik emes uıymdar (ÚEU) jobalarynyń tıimdiligin taldaýmen aınalysady. Bul jóninde Almaty Azamattyq alánsynyń tóraǵasy Qaıyrjan Ábdihalyqov Óńirlik komýnıkasıalar qyzmetinde (ÓKQ) ótken baspasóz konferensıasynda málimdedi. Uıymnyń basty maqsaty – memlekettik qurylymdar, ÚEU men azamattar arasyndaǵy ózara is-qımyldy damytý arqyly áleýmettik jáne qoǵamdyq máselelerdi birlesip sheshýge yqpal etý. Sonymen qatar, atalǵan aláns ekologıa, ınklúzıvti bilim berý jáne qoǵamdyq bastamalardy qoldaý baǵytynda da belsendi jumys júrgizýde.
Aláns jumysyna ártúrli ÚEU men belsendi azamattar qatysady. Qalanyń mańyzdy máselelerin talqylaýǵa turǵyndardy tartý úshin qoǵamdyq tyńdaý, «dóńgelek ústel» úrdisindegi jıyn men forýmdar uıymdastyrylady. Burnaǵy jyly Almatyda «Turaqty damý maqsattaryn júzege asyrý» taqyrybynda XIII Azamattyq forým ótti. Onda aımaqtaǵy turaqty damýǵa qol jetkizýdiń strategıasy men joldary qarastyryldy.
«Kelesi forým mamyr-maýsym aılarynda ótedi dep josparlanýda. Ol Almatydaǵy azamattyq qoǵamnyń ınstıtýsıonaldyq máselesi men damý perspektıvasyna arnalmaq. Forým qarsańynda ózekti taqyrypty talqylaıtyn birqatar «dóńgelek ústel» úrdisindegi jıyn men dıalogtyq kezdesýler ótkizemiz. Bul dıalog alańdaryna ózara syndarly pikir almasý men sheshim izdeýge járdemdesý maqsatynda qurylǵan Úılestirý keńesi men Almaty sarapshylar klýby belsendi qatysady», – dep atap ótti Q.Ábdihalyqov.