Qazaq ulttyq horeografıa akademıasy óziniń halyqaralyq bedelin nyǵaıtyp jatyr.
Euronews iri eýropalyq jańalyqtar telearnasy álemniń 160 eline taralatyn Modern Nomads baǵdarlamasy aıasynda Qazaqstannyń balet mektebi týraly arnaıy reportaj usyndy, dep habarlaıdy aqshamnews.kz 24.kz-ke silteme jasap.
Modern Nomads – Euronews telearnasyndaǵy baǵdarlamalardyń jańa redaksıalyq serıasy. Baǵdarlamada reporter qazirgi zaman men dástúrdi úılestire otyryp, halyqaralyq kózqaraspen Qazaqstannyń túrli mádenıet oshaqtaryna saıahat jasaıdy. Baǵdarlama kórermendi ulttyq ónermen, sánmen, sáýletpen, dızaınmen jáne eldiń mádenı damýynyń ózge salalarymen tanystyrady.
«Qazaq baletiniń jas juldyzdary Astana sahnasyn baǵyndyrýda» atty shyǵarylymda Euronews telearnasy klasıkalyq ónerdi ulttyq dástúrlermen úılestiretin talantty jas ártisterge toqtaldy. Qazaqstan jahandyq balet ortalyqtarynyń birine aınalyp keledi.
Bul rette Qazaq ulttyq horeografıa akademıasy jańa talanttardy tárbıeleý men damytýda sheshýshi ról atqarady. Jańa tolqynnyń jarqyn ókilderiniń biri – Torǵyn Leben. Ol jaqynda bedeldi eýropalyq Budapest Ballet Grand Prix-2025 balet baıqaýynda 1-orynǵa ıe boldy. Onyń oryndaýy ulttyq ónerdi jańa deńgeıge kóterip, óz eńbegimen jastardy shabyttandyryp keledi.
Modern Nomads baǵdarlamasyndaǵy qazaqstandyq balet mektebi týraly reportaj ártisterdi joǵary deńgeıde daıarlap jatqanyn kórsetip, olardyń halyqaralyq arenada tanylýyna yqpal etedi. Endi qazaqstandyq baletti, atap aıtqanda, Qazaq ulttyq horeografıa akademıasyn shet memleketter de jaqsy tanyp-biletin bolady. Bul Qazaqstannyń horeografıalyq bilim berý júıesiniń joǵary deńgeıde damyp jatqanyn jáne álemdik arenaǵa laıyq ártister daıarlaıtyn memleket retindegi bedelin nyǵaıtady. Akademıa Qytaı, Reseı, Italıa, Fransıa jáne ózge de álemdik horeografıa mekemelerimen yntymaqtastyq ornatqan.