Qazaq ulttyq qyzdar pedagogıkalyq ýnıversıtetinde Fızıka, matematıka jáne sıfrlyq tehnologıalar ınstıtýtynyń fızıka zerthanalarynyń ashylý rásimi ótti, dep habarlaıdy aqshamnews.kz
Bul zerthanalar zamanaýı PHYWE jáne PASCO quraldarymen jabdyqtalyp, bolashaq fızıka muǵalimderin daıarlaýda mańyzdy ról atqarady.
Ashylý saltanatyna Ýnıversıtettiń Dırektorlar keńesiniń tóraǵasy Omarhan Nurtaıuly, QyzPU Basqarma-Tóraǵasy rektory Gúlmıra Qanaı, ǵalymdar, mektep dırektorlary men profesorlar qatysyp, jańa zerthanalardyń lentasyn qıdy.
«Muǵalim balalarǵa dáris beretin bolǵandyqtan, onyń bilimi zor bolýy kerek. Búgingi tańda mektepterde tehnıkalyq jabdyqtaý joǵary deńgeıde. Stýdentterimiz sol jabdyqtarmen jumys isteı alýy tıis. Bilimdi muǵalimnen joǵary bilim alatyn bolsa, olardyń elimizdiń ekonomıkasyna qosar úlesi mol bolady. Mine, osynyń bárin eskerip, zerthanalardy barlyq pánderge qatysty jańartýdy maqsat etip qoıdyq. Men ýnıversıtet oqytýshylary men stýdentterine senemin. Osy salada olarǵa tıanaqty jumys tileımin», – dedi Dırektorlar keńesiniń tóraǵasy Omarhan Óksikbaev.
Fızıka-matematıka jáne sıfrlyq tehnologıalar ınstıtýty fızıka kafedrasynyń alty jańa zerthanasynyń ashylýy ýnıversıtettiń ǵylymı jumysyn jańa deńgeıge kóterýge múmkindik beredi. Zerthanalar zamanaýı quraldarmen jabdyqtalǵan. Atap aıtqanda:
PASCO quraldarymen jabdyqtalǵan «Interaktıvti synyp» zerthanasy – fızıkanyń jalpy kýrsyn tereńdetip oqytýǵa arnalǵan. Bul zerthana stýdentterge fızıkalyq zańdylyqtardy túsinýge kómektesip, olardyń ǵylymı oılaý qabiletin damytady.
PHYWE quraldarymen jabdyqtalǵan «Interaktıvti synyp» zerthanasy – fızıkanyń jalpy kýrsyn tereńdetip oqytýǵa arnalǵan, sondaı-aq fızıka boıynsha demonstrasıalyq eksperımentter men frontaldy zerthanalyq jumystardy júrgizý tehnıkasyn meńgerýge múmkindik beredi.
Elektr jáne magnetızm zerthanasy – elektromagnıttik qubylystardy zertteýge arnalǵan. Bul zerthana stýdentterge elektr tizbegin qurastyrý men durys paıdalaný arqyly fızıkalyq prınsıpterdi túsinýdi úıretedi.
Optıka zerthanasy – jaryqtyń tabıǵatyn, taralýyn jáne onyń zatpen áserlesý qubylystaryn zertteıdi
Molekýlalyq fızıka jáne termodınamıka zerthanasy – molekýlalyq fızıka men termodınamıka teorıalaryn zertteý jáne molekýlalardyń qozǵalysyn túsiný úshin arnalǵan.
Mektep fızıkasynyń pándik zerthanasy – bolashaq fızıka muǵalimderine zerthanalyq jumystar men eksperımentter júrgizýdiń tehnıkasyn úıretýge arnalǵan.
«Búgin fızıka páni boıynsha stýdentterge qajetti 6 jańa zerthanalyq kabınet ashyldy. Bul bizdiń ýnıversıtettiń stýdentteri men oqytýshylary úshin úlken qýanysh. Qazirgi ýaqytta stýdentterge jańartylǵan formatta, jańa baǵdarlamalar boıynsha dáris berý qajettiligi týyndap otyr. Osyǵan oraı, zamanaýı quraldarmen jabdyqtalǵan zerthanalar ashylyp, stýdentter osy quraldarmen zerthanalyq jumystar jasap, bilimderin jetildiretin bolady. Fızıka páni boıynsha jańa baǵdarlamalar men sıllabýstardy jasaý qajet. Osy baǵytta jumys istep, stýdentterge dáris bergen jaǵdaıda, bizdiń fızıka mamandyǵynda oqıtyn stýdentterimiz joǵary deńgeıdegi bilikti mamandar bolyp shyǵady dep oılaımyn», — dedi Fızıka, matematıka jáne sıfrlyq tehnologıalar ınstıtýty «Informatıka» kafedrasynyń profesory, pedagogıka ǵylymdarynyń doktory Keńesbaev Serik Muhtaruly.
Zamanaýı qural-jabdyqtarmen jabdyqtalǵan jańa zerthanalar men dárisqanalar oqý úderisiniń sapasyn jaqsartyp, bilim berý tıimdiligin arttyrýǵa jaǵdaı jasaıdy.
«Men fızık mamanymyn jáne stýdentter júrgizetin eksperımentterdi kórip júrip, bir sátke ózim de qaıtadan birinshi kýrsqa túsip, osy zerthanalyq jumystardy jasaǵym kelip ketti. Ásirese, men irgeli zertteýlerge, sondaı-aq optıka, magnetızm jáne atomdyq fızıka salasyndaǵy mańyzdy eksperımentterge erekshe nazar aýdardym. Bul – stýdentterdiń zamanaýı fızıkamen alǵash tanysatyn kezeńi. Osyndaı zerthanalardyń ashylǵanyna óte qýanyshtymyn. Meniń oıymsha, ásirese Qazaqstanda, jaratylystaný jáne fızıka ǵylymdary salasyndaǵy muǵalim mamandyǵy – eń mańyzdy mamandyqtardyń biri. Sebebi adamnyń osy salaǵa qyzyǵýshylyǵyn oıatyp, ony memlekettiń ekonomıkasy úshin qajet mamandyqqa baǵyttaý jáne osy salada ózin qalyptastyrýǵa kómektesý – asa mańyzdy is. Men ýnıversıtet úshin shyn júrekten qýanyshtymyn», – dep atap ótti PhD, Fızıka-tehnıkalyq ınstıtýtynyń ǵylymı-zertteý qyzmeti jónindegi dırektor orynbasary Nıkolaı Alekseevıch Chýchvaga.
Fızıka bilim berý baǵdarlamalary aıasynda ashylǵan zamanaýı zerthanalar stýdentterdiń teorıalyq bilimin tereńdetip, ǵylymı izdenisterge baýlýǵa jáne praktıkalyq daǵdylaryn damytýǵa yqpal etedi. Eksperımenttik jumystar arqyly olar zamanaýı quraldardy tıimdi paıdalanyp, logıkalyq oılaý qabiletin jetildiredi.