Almaty halyqaralyq áýejaıy - Qazaqstannyń negizgi áýe qaqpasy sanalady
Almatyda áýejaıdyń termınaly keńeıdi. Bul týraly onlaın brıfıń barysynda «Almaty halyqaralyq áýejaıy» AQ aǵa vıse-prezıdenti Zıtsers Sımons aıtty, dep habarlaıdy Almaty-akshamy.kz QazAqparatqa silteme jasap.
Onyń aıtýynsha, búginde Almaty postpandemıa kezeńinde. Tirshiliktiń barlyq salasy, sonyń ishinde avıasıa salasy belsendi túrde qalpyna kelip jatyr, reıster qaıta jandanyp, jańa baǵyttar ashylýda.
«Biz bolashaqta áýe kóligine suranystyń arta túsetinin kórip otyrmyz. Almaty halyqaralyq áýejaıy - Qazaqstannyń negizgi áýe qaqpasy sanalady. Qazirgi kezeńde biz ósip kele jatqan jolaýshylar aǵynyn jeńýge kómektesetin jańa termınal salý qajettigin kórip otyrmyz», - dep atap ótti spıker.
Zıtsers Sımons avıasıa uzaqmerzimdi josparlaýdy qajet etedi dep sanaıdy.
«Biz qazirgi termınaldy múmkindiginshe jaqsartýǵa tyrysamyz. Osydan bir aı buryn ishki termınaldyń altynshy otyrǵyzý sektorynda jóndeý jumystary aıaqtaldy, onyń aýdany buryn 177 sharshy metr bolsa, qazir - 850. Eki shyǵaberistiń ornyna qazir tórteýi bar. Zaldar keńeıdi», - dep túıindedi Zıtsers Sımons.