QHR-na jumys sapary aıasynda Almaty ákimi Erbolat Dosaev bultty esepteýler, úlken derekter jáne ıntellektýaldy sheshimder ázirleýde jetekshi qytaılyq Inspur Group kompanıasynyń basshylyǵymen kezdesti. Kelissóz barysynda taraptar qalalyq ınfraqurylymdy sıfrlandyrý, ozyq İT-sheshimderdi engizý jáne kólik júıesin ıntellektýaldy basqarý salasyndaǵy yntymaqtastyq múmkindikterin qarastyrdy, dep habarlaıdy aqshamnews.kz
Seriktestik aıasynda Inspur Group Almatyda birqatar bastamany júzege asyrýdy josparlap otyr. Atap aıtqanda, kólikti basqarý boıynsha komandalyq ortalyq qurý, serverlik jabdyqtar men sıfrlyq sheshimderdi jetkizý, Almatyda zıatkerlik kólik júıesin (ITS) engizý – bul qaladaǵy jol qozǵalysyn úılestirý tıimdiligin arttyrýǵa baǵyttalǵan. Buǵan qosa, kompanıa Almatyda kólik tehnologıalaryn damytý, tótenshe jaǵdaılarǵa áreket etý, sý resýrstaryn qorǵaý, densaýlyq saqtaý jáne zıatkerlik termınaldar salasyndaǵy sheshimderdi ázirleý jónindegi ǵylymı-zertteý ortalyǵyn ashý múmkindigin qarastyrýda.
Kezdesý sońynda taraptar qalalyq qyzmetterdiń sapasyn arttyrý jáne Almatydaǵy kólik legin basqarýdy jaqsartý maqsatynda yntymaqtastyq pen seriktestikti odan ári damytý jóninde kelisimge keldi.
Anyqtama:
Inspur Group – serverlik jabdyqtar, bultty platformalar jáne baǵdarlamalyq sheshimder jetkizetin álemdegi iri kompanıalardyń biri. Ol Qytaıdyń ishki naryǵynyń 40%-yn qamtıdy jáne 120-dan astam elde «aqyldy qalalar», qozǵalysty basqarý, salyqtyq baqylaý jáne sıfrlyq bilim berý tehnologıalaryn ázirleýge qatysady. Búginde Inspur jabdyqtaryn jetkizetin eki kompanıa Qazaqstanda jumys isteıdi. Ortalyq Azıa aımaǵynda zertteý jumystaryn júrgizýge arnalǵan servıstik ortalyq ashý josparlanýda. Sondaı-aq, LED/LCD dıspleıler, zarádtaý beketteri jáne basqa da tehnologıalyq sheshimder shyǵaratyn zaýyt salý úshin jergilikti seriktestermen birlesip jumys isteý kózdelip otyr.