Arhıtektýra, dızaın jáne ınjenerıa koleji «Jumysshy mamandyqtar jyly» bastamasyna belsendi qatysyp, zamanaýı bilim berý tehnologıalary men ádistemelerin engizýde.
Stýdentterdiń bilimin baǵalaýdyń ashyqtyǵy men obektıvtiligin arttyrýǵa múmkindik beretin ECVET (kásiptik bilim berýge arnalǵan kredıtterdiń Eýropalyq júıesi) ádisnamasy boıynsha baǵalaýdyń baldyq-reıtıngtik júıesi engizildi. Bul týraly kolej dırektory Kamal Jamangozov Óńirlik komýnıkasıalar qyzmetiniń baspasóz konferensıasynda aıtty, dep habarlaıdy aqshamnews.kz.
Spıkerdiń aıtýynsha, kolej stýdentteri WorldSkills, JasSkills jáne ProfMasterOK chempıonattaryna turaqty túrde qatysyp, joǵary daıyndyq deńgeıin kórsetýde. Sonymen qatar, bıznestiń qoldaýymen tálimgerlik jáne dýaldi oqytý júıesi engizilip, bul túlekterdiń bilim sapasyn jáne jumysqa ornalasý deńgeıin arttyrýǵa yqpal etýde.
Kolejde talantty stýdentterdi qoldaý baǵdarlamasy iske asyrylyp, onyń aıasynda ataýly stıpendıalar taǵaıyndalady jáne halyqaralyq taǵylymdamalar uıymdastyrylady. 2023-2024 jyldary 20 oqytýshy sheteldik biliktilikti arttyrý kýrstarynan ótti, al 2025 jyly taǵy 10 taǵylymdamadan ótý josparlanǵan.
Oqý ornynyń aldaǵy josparlaryna Túrkıa jáne Qytaıdyń bilim berý ortalyqtarymen halyqaralyq yntymaqtastyqty keńeıtý jáne ana tilinde oqytatyn mamannyń kómegimen «Túrik tilin úırenemiz» jobasyn iske qosý kiredi.
«Biz tek bilikti mamandardy daıarlaýmen ǵana shektelmeı, olar úshin halyqaralyq deńgeıde kásibı ósý múmkindikterin jasaýǵa umtylamyz», – dep atap ótti Kamal Jamagozov.
Kolej bilim berý úderisine ınvestısıa tartýdy, dýaldi oqytý men kásibı baǵdar berý jumystaryn damytýdy jalǵastyrýda. Jaqyn jyldary sandyq qurylys jáne energıa únemdeý tehnologıalary boıynsha jańa baǵyttar ashý, sondaı-aq Saint-Gobain kompanıasynyń qoldaýymen qurylys salasyna arnalǵan quzyrettilik ortalyǵyn qurý josparlanyp otyr.