Almaty halyqaralyq ekonomıka úshin kadrlar daıyndaıdy: «Jumysshy mamandyqtar jylyndaǵy» kópsalaly kolejdiń jańa bastamalary
Almaty básekege qabiletti ekonomıkasy bar halyqaralyq ortalyqqa aınalýǵa umtylýda, soǵan sáıkes qalanyń basty maqsattarynyń biri – bilikti mamandar daıarlaý. Óńirlik komýnıkasıalar qyzmetinde ótken baspasóz máslıhatynda Almaty kópsalaly kolejiniń dırektory Asylhan Beısetbaev Elbasynyń Jarlyǵymen «Jumysshy mamandyqtar jyly» dep jarıalanǵan 2025 jyldyń mańyzdylyǵyna toqtaldy, dep habarlaıdy aqshamnews.kz.
Kolej qazirdiń ózinde mamandar daıarlaýdy jaqsartýǵa baǵyttalǵan strategıalyq bastamalardy júzege asyrýda. Negizgi sharalardyń biri jumys berýshilermen júrgizilgen forsaıt sesıasy boldy, onyń barysynda bilim berý baǵdarlamalaryn jańartý, sala mamandaryn tartý, dýaldy oqytýdy damytý, kadrlardy maqsatty oqytýdy keńeıtý máseleleri talqylandy.
Kólik sektory, IT ındýstrıasy, jıhaz óndirisi, tońazytqysh jáne kompresorlyq mashınalar mamandary sıaqty suranysqa ıe salalarǵa erekshe nazar aýdarylady. Qala ákimshiliginiń qoldaýy kolejge kólikke tehnıkalyq qyzmet kórsetý, tońazytqysh qondyrǵylar, jıhaz óndirisi jáne IT dızaın syndy tórt baǵytta jumys isteıtin stýdenttik bıznes-ınkýbator men kópsalaly quzyret ortalyǵyn qurýǵa múmkindik berdi.
2024 jyly kolej óziniń áleýmettik seriktesi DSP ortalyǵynyń qoldaýymen Qazaqstandaǵy alǵashqy jıhaz óndirisi tehnoparkin ashty. Zamanaýı qural-jabdyqtarmen jabdyqtalǵan ol stýdentterge ozyq tehnologıalardy úırenýge jáne naqty jumys jaǵdaıyna daıyndalýǵa múmkindik beredi.
Óndiristik oqytý sheberleri men oqytýshylarynyń halyqaralyq taǵylymdamasy aıasynda kolej Qytaı, Malaızıa, Ońtústik Koreıa, Germanıa, Túrkıa elderiniń oqý oryndarymen memorandýmǵa qol qoıǵan. Stýdentterdiń akademıalyq utqyrlyǵy boıynsha kelissózder júrgizilip, halyqaralyq bilim berý standarttary engizilýde.
«Zamanaýı mamandarǵa degen suranystyń joǵary ekenin kórip otyrmyz. Halyqaralyq yntymaqtastyqtyń arqasynda stýdentterimiz shetelde taǵylymdamadan ótip, jańa tehnologıalardy meńgerip, lıngvısıkalyq daǵdylaryn keńeıtýge múmkindik aldy», - dep atap ótti Asylhan Beısetbaev.