Ákimdikte Almaty ákimi Darhan Satybaldy men Shanhaı qalasy ákiminiń orynbasary, qoǵamdyq qaýipsizdik basqarmasynyń basshysy Chjan Ia Hýn arasynda resmı kezdesý ótti.
Kelissóz barysynda taraptar ekonomıka, ınvestısıa, týrızm, sıfrlyq tehnologıalar jáne qoǵamdyq qaýipsizdik salalaryndaǵy yntymaqtastyqty keńeıtý máselelerin talqylady.
Darhan Satybaldy Qytaı Almatynyń negizgi saýda-ekonomıkalyq seriktesteriniń biri ekenin atap ótti. Búginde qalada qytaı kapıtaly bar 2,9 myńnan astam kásiporyn jumys isteıdi. Qytaımen taýar aınalymy megapolıstiń syrtqy saýdasynyń úshten birine teń. 2025 jyldyń qańtar–shilde aılarynda ózara saýda kólemi 5 mlrd AQSH dollaryna jetip, ótken jylmen salystyrǵanda 17%-ǵa ósti.
Ásirese, qaýipsizdik salasyndaǵy tájirıbe almasý máselesine erekshe kóńil bólindi. Ákim Almatynyń qoǵamdyq qaýipsizdikti arttyrý úshin Shanhaıdyń zamanaýı tehnologıalar men jasandy ıntellektti qoldanýdaǵy tájirıbesine qyzyǵýshylyq tanytty.
«Shanhaı – álemdegi eń qaýipsiz qalalardyń biri. Biz sıfrlyq sheshimderdi engizý jáne ınovasıalardy paıdalaný boıynsha tájirıbe almasýǵa múddelimiz», – dedi Darhan Satybaldy.
Kezdesýde týrızm men Almatynyń taý klasterin damytý, mádenı baılanystar jáne kreatıvti ındýstrıadaǵy birlesken bastamalar da sóz boldy. Atap aıtqanda, Almaty–Shanhaı, Almaty–Gýanchjoý jáne Almaty–Inın baǵyttarynda ashylǵan tikeleı áýe reısteriniń mańyzy aıtyldy. Sondaı-aq, venchýrlyq qorlar men kompanıalardy ortaq jobalarǵa tartý múmkindigi talqylandy.
Óz kezeginde Chjan Ia Hýn ekijaqty baılanystardy nyǵaıtýǵa daıyn ekenin jetkizip, saýda-ekonomıkalyq, mádenı jáne gýmanıtarlyq saladaǵy seriktestiktiń joǵary áleýetin atap ótti.
Kezdesý qorytyndysynda taraptar yntymaqtastyqty jalǵastyryp, Almaty delegasıasynyń qarasha aıynda Shanhaıǵa resmı saparyn ótkizýge ýaǵdalasty.