Almatyda Kardıologıa jáne ishki aýrýlar ǴZI bazasynda Respýblıkalyq endokrınologıa jáne qant dıabeti ortalyǵy ashyldy.
Ortalyqtyń ashylý saltanatyna QR Densaýlyq saqtaý mınıstri Aqmaral Álnazarova, S.Asfendıarov at. QazUMÝ rektory Marat Shoranov, Almaty q. QDSB basshysy Marat Pashımov jáne t.b. qatysty.
Búgingi tańda qant dıabeti eń mańyzdy medısınalyq jáne áleýmettik máselelerdiń biri bolyp qalyp otyr. Halyqaralyq qant dıabeti federasıasynyń Dıabettik atlasynda (11-shi basylym) jarıalanǵan sońǵy málimetterge sáıkes, 589 mln. eresek adam (20 men 79 jas aralyǵynda) qant dıabetimen ómir súredi. Bul san 2050 jylǵa qaraı 853 mln. deıin ósedi dep boljanýda. Resmı tirkelimniń derekteri boıynsha, 2025 jylǵy 31 shildege Qazaqstanda qant dıabetimen aýyratyn 544 684 pasıent tirkelgen: onyń ishinde 18 jasqa deıingi balalar – 6210, eresekter – 538 474 adam. 2 tıpti qant dıabeti pasıentterdiń jalpy sanynyń 95% quraıdy.
«Qazaqstanda endokrınologıalyq qyzmetti nyǵaıtý - densaýlyq saqtaýdyń strategıalyq baǵyty. Respýblıkalyq endokrınologıa ortalyǵyn ashýdyń maqsaty - endokrınologıalyq qyzmetti damytý jáne pasıentterge joǵary mamandandyrylǵan kómek kórsetý. Ortalyqta qoldanylatyn dıagnostıka men terapıanyń zamanaýı ádisteri emdeýdiń tıimdiligin arttyrýǵa, asqyný deńgeıin tómendetýge jáne endokrındik aýrýlary bar naýqastardyń ómir súrý sapasyn jaqsartýǵa múmkindik beredi», - dedi QR Densaýlyq saqtaý mınıstri Aqmaral Álnazarova.
Mınıstr «endokrınologıa» salasyndaǵy quzyret ortalyqtaryn kópsalaly oblystyq aýrýhanalardyń bazasynda ǵana emes, sonymen qatar medısınalyq-sanıtarlyq alǵashqy kómek deńgeıinde, asqynýlardyń damýyn boldyrmaý úshin dıabettik taban kabınetterin ashý qajettigin atap ótti. KİAǴZI óńirlerge uıymdastyrý-ádistemelik kómek kórsetetin úılestirýshi ortalyqqa aınalýy tıis. Medısınalyq kómektiń tıimdiligin, sapasyn jáne qoljetimdiligin arttyrý úshin halyqtyń kórsetiletin qyzmetterge qoljetimdiligin arttyrýǵa, jan-jaqty kómek kórsetýge, halyqtyń kórsetiletin kómekke qanaǵattanýyna jáne bilikti kadrlarmen qamtamasyz etýge nazar aýdarý qajet.
«Ortalyqtyń ashylýy - elimizdiń endokrınologıalyq qyzmetin damytýdaǵy mańyzdy qadam. Aqmaral Sháripbaıqyzy bizdiń ınstıtýttyń bazasynda Endokrınologıa jáne qant dıabeti ortalyǵyn qurý mindetin qoıǵan bolatyn. Densaýlyq saqtaý mınıstrliginiń qoldaýymen ótken jyldyń jeltoqsan aıynda bizdiń dárigerler Soltústik Eýropadaǵy eń iri qant dıabeti ortalyǵynda – Kopengagendegi Steno dıabet ortalyǵynda tájirıbeden ótý múmkindigine ıe boldy, onda dıabetologıa salasyndaǵy jetekshi mamandarmen erte dıagnostıkalaý máseleleri jáne asqynýlardy emdeýdiń zamanaýı tásilderi, sondaı-aq medısınalyq kómekti uıymdastyrý máseleleri talqylanǵan bolatyn», - dep, atap ótti Basqarma tóraǵasy Rústem Tóleýtaev.
«Ortalyq komandasynyń quramyna qant dıabeti men basqa da endokrındik patologıalardyń asqynýlaryn dıagnostıkalaýdy, emdeýdi jáne aldyn alýdy júzege asyratyn endokrınolog, oftalmolog, podolog - hırýrg dárigerler kiredi. Ortalyq KİAǴZI ornalasqandyqtan, pasıentter kardıolog, gastroenterolog, nefrolog jáne nevropatolog mamandardyń keńesin ala alady. Bul pánaralyq tásil pasıentterdi jan-jaqty baqylaýǵa jáne aýyr asqynýlardyń damýyn boldyrmaýǵa múmkindik beredi. Ortalyqta qant dıabetin baqylaýǵa arnalǵan zamanaýı qurylǵylar bar. Dárigerler qant dıabeti mektepterin júrgizedi, onyń ishinde pasıentter ınsýlın terapıasy ádistemesine úıretiledi. Pasıentter aýrý týraly júıeli bilim alady jáne ózin - ózi baqylaý daǵdylaryn alady», - dedi ortalyq basshysy Laýra Danárova.
«Dıabettik taban kabınetinde biz zamanaýı tehnologıalardy paıdalana otyryp, keshendi dıagnostıka men tıimdi emdeý ádisterin usynamyz. Aýrýdyń erte kezeńderin anyqtaýǵa jáne emdeýdi ýaqtyly taǵaıyndaýǵa, aıaqty saqtap qalýǵa jáne eń tıimdi ońaltý sharalaryn tańdaýǵa kómektesetin dıagnostıkaǵa erekshe nazar aýdarylady», - dep bólisti hırýrg- podıatr dáriger Tımýr Ekibaev.
Buǵan deıin KİAǴZI jáne Steno qant dıabeti ortalyǵynyń basshylyǵy ózara túsinistik týraly memorandým jasasty. Sonymen qatar, halyqaralyq qatysýymen gıbrıdti formattaǵy «Dıabetologıadaǵy zamanaýı tehnologıalar» ǵylymı-praktıkalyq konferensıa uıymdastyryldy. Konferensıaǵa endokrınolog, terapevt, kardıolog, qan tamyrlary hırýrg dárigerleri, jalpy tájirıbelik dárigerler jáne basqa da mamandar qatysty.