Almaty qalasy óńirlik komýnıkasıalar qyzmetinde ótken pres konferensıada Almaly aýdanynyń ákimi Arman Shamshın 2025 jyldyń 5 aıyndaǵy áleýmettik-ekonomıkalyq damýdyń qorytyndylaryn usyndy.
Onyń aıtýynsha, aýdanda kásipkerlik qarqyndy damyp keledi, sonymen qatar sanıtarlyq tazalyq pen abattandyrý jumystary kúsheıtilgen.
«Osy jyldyń 5 aıynda Almaly aýdanynan memlekettik búdjetke 528 mlrd teńgeden astam salyq tústi. Onyń shamamen 350 mlrd teńgesi respýblıkalyq búdjetke, al 180 mlrd teńgege jýyǵy jergilikti búdjetke baǵyttaldy», - dedi Arman Shamshın.
Sondaı-aq aýdan ekonomıkasyna 79,7 mlrd teńge ınvestısıa tartylǵan, onyń 45 mlrd teńgesi qurylys salasyna baǵyttalypty.
«Jyl basynan beri shaǵyn jáne orta bıznes sýbektileriniń sany 4,9%-ǵa artty. Qazirgi tańda olardyń sany 72 myńnan asty, onyń ishinde 38 myńnan astamy - jeke kásipkerler», - dep atap ótti aýdan ákimi.
Esepti kezeńde ónerkásip óndirisiniń kólemi shamamen 105 mlrd teńgeni, ishki saýda kólemi – 1,8 trln teńgeni qurady. İshki saýda qurylymynda:
- - bólshek saýda aınalymy – 381 mlrd teńge (2024 j. – 1 034,8 mlrd teńge),
- - kóterme saýda – 1 403 mlrd teńge (2024 j. – 3 181,3 mlrd teńge).
Ákim sonymen qatar aýlalar, kósheler, saıabaqtar, skverler men qoǵamdyq keńistikterdi sanıtarlyq tazalaý jumystary da kóptep júrgizilip jatqanyn aıtty. Uzyndyǵy 186 shaqyrym bolatyn 110 kósheni tazalaý jumystarymen 3 merdiger uıym aınalysady, bul jumystarǵa 241 jumysshy jáne 162 arnaýly tehnıka tartylǵan. Turǵyndardyń shaǵymdaryna jedel áreket etý úshin 3 jedel top qurylǵan.
Aýdandaǵy 425 aýla aýmaǵyn kútip-ustaýǵa 5 merdiger uıym, 325 jumysshy jáne 45 tehnıka jumyldyrylǵan.
48 jasyl aımaqty - saıabaqtar, skverler men býlvarlardy 113 jumysshy kútip ustap, 25 tehnıka jumysqa tartylǵan.
«Aýlalar men kóshelerdi, saıabaqtar men qoǵamdyq keńistikterdi tazartý - jaıly qalalyq ortany qalyptastyrýdyń mańyzdy bóligi. Bıyl biz aýlalarǵa arnalǵan 9 birlik arnaıy tehnıkany satyp alýdy josparlap otyrmyz», - dep túıindedi sózin Arman Shamshın.