Almaty qalasynyń Almaly aýdanynda skverlerdi, kóshelerdi jáne trotýarlardy abattandyrý jumystary júıeli túrde jalǵasyp jatyr, - dep habarlaıdy aqshamnews.kz.
Aýdanda jaıly qalalyq orta qalyptastyrý baǵytyndaǵy jumystar jalǵasyp jatyr. Qoǵamdyq keńistikterdi jaqsartýǵa, kógaldandyrýǵa, jol jıegin jóndep, demalys aımaqtaryn jańartýǵa kóp kóńil bólinip otyr. Bıylǵy jyly birqatar mańyzdy nysandarda ınfraqurylymdy jetildirý jumystary bastaldy nemese bastalyp qalady alda. Almaty qalasynyń óńirlik komýnıkasıalar qyzmetiniń alańynda aýdan ákimi Arman Shamshın osylaı dedi.
Atap aıtqanda, A.Imanov atyndaǵy skverde jóndeý jumystary aıaqtalýǵa jaqyn. Sonymen qatar, «Halyq qatysatyn búdjet» baǵdarlamasy aıasynda mamyr aıynan bastap Qarasaı batyr jaıaý júrginshiler kóshesiniń Abylaı han dańǵylynan Naýryzbaı batyr kóshesine deıingi bóliginde abattandyrý jáne kógaldandyrý jumystary júrgizilip jatyr. Bul jumystar shilde aıynda aıaqtalady dep josparlanyp otyr.
Kabanbaı batyr kóshesinde (Baıseıitova kóshesinen Abylaı han dańǵylyna deıin), sondaı-aq Astana alańynda (Panfılov kóshesinen Abylaı han dańǵylyna deıin) trotýar jamylǵysy aýystyryldy. Jóndeý jumystary naqty qajettilikke saı, ıaǵnı jaıaý júrginshilerge qolaısyzdyq týdyratyn, tozyǵy jetken jerlerde ǵana júrgiziledi.
Tamyz aıynda jańa jobalar iske asady: Kabanbaı batyr kóshesiniń (Abylaı han dańǵylynan Seıfýllın dańǵylyna deıin) jáne Gogol kóshesiniń (Nazarbaev dańǵylynan Abylaı hanǵa deıin) trotýarlary jańartylmaq.
Sonymen qatar, Ǵ.Músirepov atyndaǵy jasóspirimder teatry janyndaǵy skver men Jibek Joly dańǵyly boıyndaǵy «Arbat» jaıaý júrginshiler aımaǵyn abattandyrý boıynsha jobalyq-smetalyq qujattama daıyn. Bul ýchaskelerdegi jóndeý jumystary tamyz aıynda bastalady.
«Bizdiń balansymyzda Abaı men Túrkebaev kósheleriniń qıylysynda eski ǵımarat bar. Biz bul nysandy qalaı jańalaý jaǵyn uzaq ýaqyt qarastyrdyq. Qala ákimdiginiń kelisimimen atalǵan ǵımaratty egde jastaǵy azamattarǵa arnap, solardyń demalatyn ortalyǵy retinde paıdalaný jobasyn jasadyq. Munda zeınetkerlerdiń tájirıbesi men bilimi balalarǵa arnalǵan úıirmeler arqyly da qoldanylatyn bolady», – dedi Arman Shamshın.
Almaly aýdany turǵyndardyń shynaıy suranystaryna negizdelgen sheshimderdi usynyp, qolaıly orta qalyptastyrý jumystaryn turaqty túrde júrgizip keledi.