Aýdanda jalpy sany 43 mektep jumys isteıdi, onyń 29-y memlekettik te, 14-i jeke menshik mektep. №58 mektepke qosymsha 600 oryndyq japsarlas jaı salynyp jatyr.
№16 mektepte de týra osyndaı 300 oryndyq japsarlas ǵımaratty salýdy bastadyq, onyń qurylysy 2026 jyldyń ekinshi toqsanynda aıaqtalyp qalady deıdi, Óńirlik komýnıkasıalar qyzmetinde ótken pres-konferensıada Almaly aýdanynyń ákimi Arman Shamshın.
Budan bólek, aýdandaǵy 4 mektepti seısmıkalyq turǵyda berik qylý jumysy da qolǵa alynǵan. Bıyl №10, 13, 21, 43 pen memlekettiń menshigine qaıtarylǵan «Teremok» balabaqshasynda jóndeý men seısmıkalyq kúsheıtý jumystary bastalypty. Aýdanda jalpy 62 balabaqsha jumys isteıdi. Onyń 35- jeke balabaqsha da, 29-i memlekettik tapsyrys boıynsha jumys isteıtinder.
«Qazir qurylys basqarmasy Tastaq shaǵynaýdanynda 240 oryndyq jańa balabaqsha salý úshin baıqaý ótkizip jatyr. Qurylysy bıylǵy tamyzda bastalyp, 2026 jyldyń tamyzynda aıaqtalady. Sonymen birge, 13 balabaqshada bıyl jóndeý jumysyn bastaımyz», - dep tolyqtyrdy ákim.
Áleýmettik ınfraqurylymnyń taǵy bir mańyzdy baǵyty – densaýlyq saqtaý. №3 qalalyq emhana kúrdeli jóndeýdep ótip, jaqynda paıdalanýǵa berilmek. Aýdanda jalpy sany 12 memlekettik jáne 13 jeke menshik mekeme bar. Almaly aýdanynyń densaýlyq saqtaý júıesine Respýblıkalyq jáne qalalyq uıymdar kiredi, olar turǵyndarǵa sapaly medısınalyq kómek kórsetip keledi.
Tórekulov kóshesi men Jibek joly dańǵylynda ornalasqan adam reprodýksıasy qalalyq ortalyǵynyń eki korpýsyn jańalaý jumystary aıaqtalyp qalǵan. Qurylys basqarmasy №1 perzenthana qurylysy boıynsha jáne Áıteke bı – Masanshy kósheleriniń qıylysynda 500 adam qabyldaıtyn emhana qurylysy boıynsha (memlekettik saraptamanyń qorytyndysy 2025 jylǵy 14 sáýirde alynǵan, qurylys somasy – 9 301 mln tg) merdiger uıymdy anyqtaý maqsatynda baıqaý ótkizip jatyr. Qurylys-montaj jumystaryn shilde men qyrkúıek aıynda bastaý josparlanypty. 2026 jyldyń 4 toqsanyna aıaqtalmaq.
«Tastaq aýdanynda, Raıymbek dańǵyly 312 mekenjaıynda ornalasqan múmkindigi shekteýli jandarǵa arnalǵan sport ortalyǵynyń qurylysy erekshe mańyzǵa ıe. Kópfýnksıaly bul ortalyq erekshe qajettiligi bar adamdardy saýyqtyrý men jattyqtyrýǵa arnalǵan. Qurylys jumystary maýsym aıynda bastaldy. 2026 jyldyń qarasha aıynda aıaqtaýdy josparlap otyrmyz. Búdjeti – 3,9 mlrd teńge»,- deıdi aýdan ákimi.
Abaı men Masanshy kóshesiniń qıylysyndaǵy ǵımaratty jańartý jobasy ázirleýdiń sońǵy kezeńinde tur. Ákimdiktegilerdiń aıtýynsha, bul jerde balalarǵa arnalǵan kópbeıindi ońaltý ortalyǵy ornalaspaq.
Aýdan ákimdigimen telegram kanal arqyly da baılanysqa shyǵa alasyz. Ol jerde suraq qoıyp, mekenjaıyńyzdy kórsetip, sýretińizdi qoısańyz boldy. Turǵyndardyń aryz-ótinishi birden qabyldanady deıdi, ákimdiktiń ókilderi.