Alergıa – bul úkim emes, aǵzanyń tıimsiz ımýndyq jaýaby ǵana, ony jeńýge bolady.
Búginde Almatyda alergıalyq aýrýlardy dıagnostıkalaýdyń jáne emdeýdiń zamanaýı ádisteriniń barlyǵy qoljetimdi, sonyń ishinde alergenge spesıfıkalyq ımmýnoterapıa (ASIT) da bar. Bul týraly Almaty qalasynyń bas alergology Taır Nýrpeısov Óńirlik komýnıkasıalar qyzmetiniń baspasóz konferensıasynda aıtty, dep habarlaıdy aqshamnews.kz.
«Kez kelgen alergıalyq aýrýdy emdeýge bolady. Tipti alergıanyń ózin de tolyqtaı emdeýge bolady. Almatyda alergıanyń negizgi sebebin emdeýge baǵyttalǵan ASIT ádisine arnalǵan zamanaýı, tıimdi ári qaýipsiz preparattar qoldanylady – bul osy saladaǵy «altyn standart» bolyp sanalady», – dep atap ótti ol.
Onyń aıtýynsha, ASIT aǵzanyń alergenderge sezimtaldyǵyn tómendetip, ýaqyt óte kele sensıbılızasıadan tolyq arylýǵa múmkindik beredi. Bul terapıa ár adamǵa jeke tańdalady jáne balalarǵa da, eresekterge de júrgizilýi múmkin.
Nýrpeısov alergıany anyqtaý burynǵydan áldeqaıda qoljetimdi bolǵanyn da atap ótti: terilik synamalar, zerthanalyq taldaýlar, otandyq jáne sheteldik ádister – munyń bári búginde kóptegen medısınalyq ortalyqtar men zerthanalarda qoldanylady, olardyń basym bóligi MÁMS júıesi arqyly qyzmet kórsetedi. Keıbir jaǵdaılarda alergıa tipti sábıler men egde jastaǵy adamdarda da anyqtalýy múmkin, alaıda durys tásil qoldanylsa, kez kelgen jasta dıagnostıka jasaýǵa bolady.
«Alergıa – bul ımýnıtettiń bir bóligi. Sondyqtan durys tamaqtaný, belsendi ómir salty, sport – munyń bári aldyn alýda úlken ról atqarady. Tipti tynys demikpesi kezinde de belsendilikten bas tartýǵa bolmaıdy. Kóptegen kásibı sportshylar bala kúninde demikpemen aýyrǵan», – dep qosty Nýrpeısov.
Qorytyndylaı kele, ol almatylyqtarǵa birneshe qarapaıym, biraq mańyzdy keńes berdi: balalarǵa sterıldi jaǵdaı jasamaý, óz betinshe emdelmeý, tozań maýsymynda serýendeýde maska taǵý, ózińizge laıyq sport túrin tańdaý jáne mamandarǵa júginýden qoryqpaý.