Kóktemniń kelýimen Almatyda ósimdikterdiń gúldeý maýsymy bastalady, bul alergıasy bar adamdardyń densaýlyǵyna aıtarlyqtaı áser etedi. Alaıda ýaqtyly dıagnostıka men durys júrgizilgen profılaktıkalyq sharalar qala turǵyndaryna tolyqqandy ómir súrýge múmkindik beredi. Bul jóninde Almaty qalasynyń qoǵamdyq densaýlyq saqtaý basqarmasynyń bas alergolog-ımmýnology, medısına ǵylymdarynyń doktory Taır Nýrpeısov óńirlik komýnıkasıalar qyzmetiniń baspasóz konferensıasynda málimdedi, dep habarlaıdy aqshamnews.kz.
Onyń aıtýynsha, kóktem-jaz mezgilinde eń belsendi alergender – aǵashtardyń tozańy men mamyǵy, atap aıtqanda, terek, qaıyń, qaraǵash, jóke, sondaı-aq keń taralǵan tımofeevkany qosa alǵanda, shabyndyq shópter bolyp tabylady. Keıinirek, shilde-tamyz aılarynda, aramshópterdiń – jýsan, ambrozıa jáne basqa da ósimdikterdiń gúldeý maýsymy bastalady.
«Almatyda aǵash túrleri óte kóp, tipti sırek jemis beretin, biraq soǵan qaramastan tozań bóletin sýbtropıkalyq túrleri de bar. Aýadaǵy tozań konsentrasıasy keı jaǵdaıda, ásirese qurǵaq ári jeldi kúnderi, aıtarlyqtaı joǵary bolýy múmkin», – dep atap ótti maman.
Sonymen qatar, ol alergıany tek tozań ǵana emes, jyl boıy áser etetin titirkendirgishter de qozdyrýy múmkin ekenin aıtty. Olarǵa úı shańy, zeń, úı janýarlarynyń teri bólshekteri jatady. Sondyqtan der kezinde alergolog-dárigerge qaralyp, óz betinshe emdelmeý mańyzdy.
Sondaı-aq, Nýrpeısov alergıa belgilerin jaı sýyq tıý nemese JRVI-den qalaı ajyratýǵa bolatynyn túsindirdi. Maýsymdyq alergıa kezinde kóbine kózdiń qyshýy, túshkirý, dene qyzýynsyz murynnan sý aǵýy jáne jyl saıyn qaıtalanatyn belgiler baıqalady. Al vırýstyq ınfeksıalar álsizdik, dene qyzýy jáne bulshyqet aýyrsynýymen qatar júredi. Degenmen, onyń aıtýynsha, kez kelgen jaǵdaıda zamanaýı antıgıstamındik preparattardy qabyldaýdan bastaý kerek – olar JRVI kezinde de, alergıalyq rınıt kezinde de tıimdi.
«Men óz pasıentterime emdeýdi árqashan alergıaǵa qarsy quraldardan bastaýdy usynamyn. Ásirese, dene qyzýy 38.5 ° C-tan tómen bolsa, ony tómendetpeý mańyzdy», - dep atap ótti sarapshy.