Qazaqstan Ulttyq Banki 2022-2023 jyldary shyǵatyn ulttyq valútadaǵy koleksıalyq monetalardyń taqyrybyn bekitti, dep habarlaıdy Almaty-akshamy.kz
«Aldaǵy eki jylda «Este qalatyn oqıǵalar men birtýar adamdar», «Qazaqstannyń ádet-ǵuryptary, ulttyq oıyndary», «Qazaqstannyń florasy men faýnasy», «Dala qazynasy», «Kóshpendilerdiń ǵıbadat janýarlary – totemderi», «Sıqyrly nyshandar», «Banknottardaǵy portretter», «Qazaqstan halqynyń ertegileri», «Qazaqstannyń qalalary» serıalaryn jalǵastyramyz Sıpaty tanys bul monetalar serıasynan bólek jańa serıalar da shyǵarylmaq, ol – «Jaratylys syrlary» men «Qazaqstandy monetalar arqyly zertte!» serıalary. «Jaratylys syrlary» atty jańa serıa kóne órkenıettiń kózimen (táńirshildik, úndi, qytaı, mysyr órkenıetteri jáne t.b) álem qandaı bolǵanyn aıqyndamaq.
Bul serıa aıasynda pazl túrindegi biregeı qurastyrý tehnologıasynyń kómegimen tantal men kúmisten jasalatyn eki komponentti monetalar shyǵarylady. Iaǵnı, monetanyń tantaldan jasalǵan jaǵynda kóne órkenıettiń elementteri, al, kúmisten quıylǵan jaǵynda qazirgi zamannyń kórinisteri beınelenedi.
Eń birinshi bolyp «Táńirlik tanym» men «Úndilik tanym» atty monetalar jaryqqa shyǵady. Al, «Qazaqstandy monetalar arqyly zertte!» atty jańa serıa álemdik qaýymdastyqqa elimizdiń, sonyń ishinde, zamanaýı mádenıet, óner, sport salalaryndaǵy jetistikterin pash etedi.
Monetalardy jasaǵan kezde jastar arasyndaǵy qazirgi trendterden bastap, biregeı tabıǵı oryndarymyzǵa deıingi ártúrli taqyryptar qamtylady. 2022 jyly «Saqtar stıli» jańa serıasynan nomınaly 100 teńgelik sırkýlásıalyq monetalardyń 5 túri 5 mln danamen aınalymǵa túsedi. Sondaı-aq, «Barys ilbis» (2022 jyly) pen «Balqash jolbarysy» (2023 jyly) beınelengen «Tabıǵatty aıalaıyq» atty koleksıalyq blısterlik jınaqtar shyǵady degen de jospar bar.
Olar 1, 2, 5, 10, 20, 50, 100 jáne 200 teńgelik nomınalmen 8 sırkýlásıalyq moneta bolyp jáne 30 000 danamen shyǵady» delingen habarlamada.
2022-2023 jyldary shyǵatyn monetalar týraly tolyq jospar QUB saıtynda jarıalanady.