QR Premer-Mınıstriniń orynbasary Eraly Toǵjanov «MedInvestGrýpp Qazaqstan» kompanıasynyń qoldaýymen ashylǵan Iadrolyq medısına ortalyǵyna bardy. Bul elimizdegi alǵashqy ınovasıalyq medısınalyq ortalyq, onyń qyzmeti onkologıalyq aýrýlardy dıagnostıkalaýǵa baǵyttalǵan. Ortalyqta medısınalyq kómektiń kepildik berilgen kólemi sheńberinde barlyq qazaqstandyqtarǵa tegin jáne qoljetimdi zertteýler júrgiziledi, dep habarlaıdy Almaty-akshamy.kz
Iadrolyq medısına ortalyǵy onkologıalyq patologıalardy erte anyqtaý úshin eń zamanaýı jabdyqtarmen jabdyqtalǵan. Joǵary tehnologıalyq PET skaneri – Biograph Horizon, Siemens pozıtrondy-emıssıalyq jáne kompúterlik tomografıa múmkindikterin biriktiredi.
Zertteý isiktiń qurylymy men fýnksıonaldyq erekshelikterin molekýlalyq deńgeıde baǵalaýǵa múmkindik beredi. Bul ádis eń kishkentaı oshaqtardy anyqtaýǵa jáne neoplazmalardyń ornalasýy men shekaralary týraly naqty málimettermen adam aǵzasynyń úsh ólshemdi beınesin alýǵa múmkindik beredi. Vıse-premer ortalyqtyń múmkindikterimen tanysyp, PET/KT dıagnostıkasy onkologıalyq aýrýlarmen kúresýdiń mańyzdy quraldarynyń biri ekenin atap ótti.
«Inovasıalyq zertteýler pasıenttiń jaǵdaıy týraly naqty aqparat alýǵa múmkindik beredi. Bul aýrýdy naqtylaý kezeńinde de, emdeý kezeńinde de mańyzdy. Eń zamanaýı aparatýramen jabdyqtalǵan medısınalyq ortalyqtar Qazaqstan azamattarynyń densaýlyǵyn saqtaý jáne ómir súrý uzaqtyǵyn arttyrý úshin óte mańyzdy», — dedi E. Toǵjanov.
«MedInvestGrýpp Qazaqstan» kompanıasy satyp alǵan jáne Almaty qalasynyń ıadrolyq medısına ortalyǵynda paıdalanylatyn aparatýra dárigerlerge jylyna 7 000 pasıentti qabyldaýǵa múmkindik beredi.
Bul emdeý men dıagnostıkaǵa muqtaj qazaqstandyqtarǵa zertteýlerdiń kúrdeli rásimin kútý merzimin aıtarlyqtaı qysqartýǵa kómektesedi. Osyndaı ortalyqtar jaqyn arada Oral, Shymkent jáne Qaraǵandy qalalarynda MIG Qazaqstan ınvestısıalyq kompanıasymen memlekettik-jekemenshik áriptestik aıasynda ashylatyn bolady.
