«Alataý» dástúrli óner teatry kórermenderge jańa qoıylymdar daıyndaýda. Olardyń qatarynda uly aqyn, fılosof Abaı Qunanbaıulynyń 180 jyldyǵyna jáne kórnekti kompozıtor Nurǵısa Tilendıevtiń 100 jyldyǵyna arnalǵan spektáklder bar, dep habarlaıdy aqshamnews.kz
Sondaı-aq, aldaǵy premeralardyń biri – máńgilik mahabbat týraly ańyzǵa aınalǵan oqıǵany baıandaıtyn «Estaıdyń Qorlany» mýzykalyq dramasy. Bul qoıylymdardyń tusaýkeseri 2025 jyldyń kúzine josparlanǵan.
Qazirgi VIII maýsymda teatr repertýary tórt jańa qoıylymmen tolyqty: «Mamluk. Sultan Beıbarys» saýndramasy, QULAN feerıasy, Alatau FM radiosy mýzykalyq komedıasy jáne qazaqtyń áıgili kompozıtory, aqyny, aıtys sheberi Birjan sal Qojaǵululynyń ánderine negizdelgen «Temirtas» rekvıem-spektakli.
«Teatr repertýarynan qyzyqty saýndramalardy, jarqyn feerıalardy, mýzykalyq komedıalardy jáne rekvıem-spektaklderdi kórýge bolady. Bul batyl eksperımentter bizdiń trýppamyzǵa jańa kókjıekterdi ashyp, kórermenderge erekshe teatrlyq áser syılaıdy, dástúrli teatrdyń shekarasyn keńeıtedi. Aıta keterligi, ótken jyly teatr sahnasynda 50-den astam qoıylym qoıylyp, kórermender kóbeıip, mazmundy mádenı baǵdarlama jasaldy. Jalpy, 2024 jyly bizdiń spektáklderimizdi 62 myń adam tamashalady – bul sońǵy úsh jyldaǵy rekordtyq kórsetkish», – dep málimdedi teatr dırektory Maqsat Nuralıev Óńirlik komýnıkasıalar qyzmetiniń brıfıńinde.
«Alataý» teatrynyń qoıylymdary 20-dan astam ulttyq aspapta sheber oınaıtyn «Alataý» etno-folklorlyq ansambliniń jandy súıemeldeýimen ótedi. Trýppa quramynda «Alataý» bı ansambli, aqyndar, dástúrli án oryndaýshylary men talantty akterler bar.
