Nege qart adamdar alaıaqtardyń qurbanyna aınalady? Buǵan olardyń jasy nemese este saqtaý qabileti emes, jınaq qory áser etedi, - dep habarlaıdy aqshamnews.kz tilshisi.
Kıberqylmys mamandarynyń aıtýynsha, ádette zeınetkerlerde saqtap qoıǵan artyq aqsha bolady.
AQSH-tyń Federaldyq tergeý búrosynyń ınternet qylmystary týraly keıingi esebine sáıkes, byltyr qarıalar alaıaqtardyń áreketterinen shamamen 5 mıllıard dollardan (2 trıllıon 598 mıllıard 191 mıllıon teńge - esk.) aıyrylǵan.
Alaıaqtar - keremet ártister, olar kez kelgen adamdy aldaı alady. Biraq kóbine olardyń tańdaýy zeınetkerlerge túsedi, óıtkeni alaıaqtar egde jastaǵylardyń aqshasy baryna senimdi. Olardyń arnaıy senarıi bar, eger siz de sol boıynsha jaýap berseńiz, onda alaıaqtyq iske asady.
Alaıaqtyqtyń 5 negizgi belgisi:
-
Úreıge berilseńiz
Máselen, siz - zeınetkersiz. Eger sizge beıtanys qońyraý shalyp, nemereńiz túrmede ekenin, oǵan tezirek aqsha keregi aıtylsa, demek bul - alaıaqtar. Olar sizdi shuǵyl sheshim qabyldaýǵa ıtermeleıdi. Tipti bir sát kidirip, oılanýǵa múmkindik bermeıdi. -
Shuǵyl sheshim qabyldaý kerek bolsa
Úreı týdyrmaıtyn, qysym kórsetilmeıtin, kerisinshe tıimdi usynysty jiberip almaý múmkindigi aıtylyp, jyldam áreket etýge ıtermelense, demek sizge alaıaqtar qońyraý shalyp tur. Bul – ınternette jıi kezdesetin jalǵan dúkender men ınvestısıalyq alaıaqtyq. -
Beıtanys birden jaqynyńyzǵa aınalsa
Eger bireý ómirińizde aıaqasty paıda bolyp, senimińizge kirip, bank esepshotyńyzdan aqsha sheship alýǵa ıtermelese, bul - qaýiptiń belgisi. -
Sóılesip turǵan adam ózin bedeli bar tulǵa retinde tanystyrsa
Beıtanys ózin "polısıa qyzmetkeri", "zańger" dep tanystyrsa da, eger siz bul adamdy buryn kórmeseńiz, onyń sózine sene salýǵa bolmaıdy. -
Tólemdi kúmándi tásilmen surasa
Eger sizden aqshany kúmándi bireýlerdiń kartasyna aýdarý, krıptovalútamen tóleý suralsa, demek bul - alaıaqtar.
Mamannyń keńesi:
Aqsha aýdaryp jatqanda, "qazir aýdarmasam ne bolady?" degen suraqtyń ornyna, "aýdarsam ne bolýy múmkin?" dep oılanyńyz. Bul oıyńyzdy jınaqtap alýǵa kómektesedi.
Mysaly, Astanada 66 jastaǵy zeınetker áıel ózin polısıa men Ulttyq banktiń qyzmetkerleri dep tanystyrǵan alaıaqtarǵa senip, 16 mıllıon teńgesinen aıyrylǵan. Alaıaqtar oǵan úıin satqyzyp, aqshany "qaýipsiz shotqa" aýdarýǵa májbúrlegen.
Sondyqtan kez kelgen nársege sene bermeı, ózińizdi, shotyńyzdy jáne jeke málimetterińizdi qorǵaýǵa tyrysyńyz. Kúmán týdyratyn jaǵdaılar bolsa, jaqyndaryńyzben keńesip, asyǵys sheshim qabyldamańyz.