Almaty qalasynyń ákimi Darhan Satybaldy jumys sapary barysynda «Atakent» qazaqstandyq iskerlik yntymaqtastyq ortalyǵyn qaıta qurý jobasymen tanysty.
Sapar aıasynda nysannyń iskerlik tartymdylyǵyn arttyrýǵa jáne jaıly qoǵamdyq ortany qurýǵa baǵyttalǵan keshendi jańǵyrtý jospary usynyldy. Jobada aýmaqty abattandyrýǵa, kógaldandyrýǵa jáne zamanaýı ýrbanıstik sheshimderdi engizýge erekshe nazar aýdaryldy.
«Atakenttiń» sýburqaq kesheni qaladaǵy eń kórikti oryndardyń birine aınalýy kerek. Bul jobanyń júregi bolmaq», - dedi Darhan Satybaldy.
Sonymen qatar, ol jumystyń merzimi men sapasyn saqtaýdyń mańyzdylyǵyn atap ótti.
Qaıta qurý 2025 jylǵy shildeden bastap kezeń-kezeńimen júrgiziledi. 74 myń m² jol men trotýardy kóriktendirý, 170 myń m² jasyl aımaqty abattandyrý, jaryq shamdary, kóshe jıhazdary, sport alańdary, modýldi ájethanalar men avtomattandyrylǵan sýarý júıesin ornatý josparlanǵan.
Qala basshysy aǵash tańdaǵanda ártúrli bolýyna mán berip, Almatynyń klımattyq erekshelikterine saı japyraqty aǵash túrlerin otyrǵyzýdy aıtty.