Telefon arqyly alaıaqtyq jasaý faktileri kóbeıýde
Qyrkúıek aıynyń sońyna deıin baılanys operatorlary alaıaqtar qońyraý shalatyn jalǵan telefon nómirlerin anyqtap, buǵattaıtyn bolady, dep habarlaıdy Almaty-akshamy.kz.
Bul týraly QR Sıfrlyq damý, ınovasıalar jáne aeroǵarysh ónerkásibi mınıstri Baǵdat Mýsın Áleýmettik jelide jazdy.
Ol búgin, 2022 jyldyń 4 tamyzynda QR İshki ister mınıstri Marat Ahmetjanovpen birlese ótken keńeste ınternet-alaıaqtyqqa qarsy is-qımyl máseleleri talqylanǵanyn jetkizdi.
Ókinishke oraı, elimizde ınternet pen telefon arqyly alaıaqtyq jasaý faktileri kóbeıýde. Máselen, 2016 jyly - 1 myń jaǵdaı tirkelgen bolsa, 2021 jyly - 21 myńǵa deıin ósken.
«Biz qazirgi ýaqytta baılanys operatorlarymen birge osy máselege qatysty birlesken is-sharalardy júzege asyrýdamyz. Búgingi tańda alaıaqtarmen kúresýdiń tıimdi ádisteriniń biri- jalǵan nómirlerdi buǵattaý. Qyrkúıek aıynyń sońyna deıin baılanys operatorlary alaıaqtar qońyraý shalatyn jalǵan telefon nómirlerin anyqtap, buǵattaıtyn bolady»,-dep jazdy Mýsın.
Sıfrlyq damý mınıstrligi azamattardyń qaýipsizdigin eskere otyryp, uıaly nómirlerdi tirkeý kezinde bıometrıalyq sáıkestendirý júıesin engizýdi qarastyrýda. Osylaısha, biz telefon nómirleriniń bóten adamdarǵa tirkelý jaǵdaılarynyń aldyn alǵymyz keledi.
Sondaı-aq, biz ınternet-alaıaqtyqqa qarsy aqparattyq-túsindirý baǵytynda banktermen tyǵyz áreket jasaýdy usynamyz, óıtkeni alaıaqtyq faktilerdiń oryn alýy kóp jaǵdaıda bank operasıalarymen tikeleı baılanysty. Bank qyzmetkerleri turǵyndarǵa habarlasqan ýaqytta, onyń shynymende bankten habarlasyp turǵanyna kóz jetkizý úshin SMS-habarlamalar arqyly sáıkestendirý júıesin engizýge bolady.
Kezdesý barysynda Qoǵamdyq keńes músheleri ınternet alaıaqtyǵy máselesin sheshý turǵysynda óz usynystaryn ortaǵa saldy. Mysaly, alaıaqtarǵa jáne olardyń aıla-amaldaryna qatysty barlyq málimetter engiziletin arnaıy platforma qurý týraly da aıtyldy.
«Biz usynǵan bastamalar problemany túbegeıli joımaıtynyn atap ótkim keledi, bul - máseleni sheshýdiń bir ǵana bóligi. Sondyqtan tehnologıalyq turǵydan basqa, arnaıy jobalar arqyly halyqtyń qarjylyq jáne zańdyq saýattylyǵyn arttyrý baǵytynda jumystardy kúsheıtýimiz qajet. Internet alaıaqtyq máselesin tıimdi sheshý baǵytynda kóptegen ıdeıalar men tyń usynystar aıtyldy. Endi olardyń barlyǵyn birlese iske asyrýmyz qajet»,-dedi mınıstr.