2024 jyldyń 4-7 jeltoqsan aralyǵynda Muhtar Áýezov atyndaǵy Qazaq ulttyq drama teatry Alataýdyń kúngeıi men teriskeıin qonys etken baýyrlas Qyrǵyz eline gastróldik is-saparmen attanbaq, dep habarlaıdy aqshamnews.kz
1926 jyly irgetasy qalanǵan qazaq óneriniń qarashańyraǵy, qazaqtyń tuńǵysh kásibı teatry Muhtar Áýezov atyndaǵy Qazaq ulttyq drama teatry – Qazaqstannyń jetekshi óner ordasy. Ol óz tarıhynda úlken belesterden ótip, búgingi kúni ulttyq ónerdiń sımvolyna aınaldy. Shyǵarmashylyq áleýeti joǵary teatr ujymy – bıik kórkem óner, jańa turpatty mádenıet jasaý; otansúıgishtik, izgilik, adamgershilik, sulýlyqty dáripteý; álemdik mádenı-rýhanı keńistikke erkin enip, ulttyq ónerimizdi tanytý jolynda qaltqysyz qyzmet etýde.
2026 jyly qazaq óneriniń qarashańyraǵy Muhtar Áýezov atyndaǵy Qazaq ulttyq drama teatry 100 jyldyq mereıtoıyn atap ótedi. Ǵasyrlyq toı qarsańyndaǵy saltanatty gastróldik saparyn jer jánnáty Jetisý oblysynan bastaǵan óner ujymy Ózbekstan, Qaraqalpaqstan elderin aralap, jeltoqsannyń 4-7 aralyǵynda baýyrlas qyrǵyz eliniń bas shahary Bishkek qalasyna at basyn tirep, T. Abdýmomynov atyndaǵy Qyrǵyz ulttyq akademıalyq drama teatrynyń sahnasynda óner kórsetedi. Gastróldik baǵdarlama boıynsha shoqtyǵy bıik, qazaq jáne álemdik dramatýrgıa jaýharlary «Qyz Jibek», «Qoshtasqym kelmeıdi», «Qorqyttyń kóri», «Máńgilik bala beıne» syndy spektáklder kórermen nazaryna usynylady. Bul qoıylymdarda ózindik qoltańbasymen kórermendi tánti etip júrgen birqatar óner ıeleri Qazaqstannyń Halyq ártisi Dýlyǵa Aqmolda, Qazaqstannyń eńbek sińirgen qaıratkeri Bolat Ábdilmanov, Qazaqstannyń eńbek sińirgen qaıratkeri Shynar Janysbekova, Qazaqstannyń eńbek sińirgen qaıratkeri Shynar Asqarova, Qazaqstannyń eńbek sińirgen qaıratkeri Jalǵas Tolǵanbaı, Mádenıet salasynyń úzdigi Kúnsulý Shaıahmetova, Qazaqstan Jastar odaǵy «Serper» jastar syılyǵynyń ıegeri Saltanat Baqaeva, Qazaqstan Jastar odaǵy «Serper» jastar syılyǵynyń ıegeri Zarına Karmen, Asan Májıt syndy teatr artıseri óner kórsetedi.
Gastróldik sapar QR Mádenıet jáne aqparat mınıstrliginiń qoldaýymen ótedi.
4 jeltoqsan 18.30-da Ǵ. Músirepov «Qyz Jibek» spektakli /mýzykalyq drama/ 2 saǵat
5 jeltoqsan 18.30-da A. Volodın «Qoshtasqym kelmeıdi» /drama/ 1 saǵat 40 mın
6 jeltoqsan 18.30-da I. Ǵaıyp «Qorqyttyń kóri» /drama/ 2 saǵat
7 jeltoqsan 18.30-da R. Muqanova «Máńgilik bala beıne» /tragedıa/ 2 saǵat