Qazaqstanda Kaspıı teńizinde ıtbalyqtardyń ólekseleriniń tabylýy boıynsha alǵashqy synamalardyń nátıjeleri belgili boldy, dep habarlaıdy aqshamnews.kz.
Ekologıa jáne tabıǵı resýrstar mınıstri Erlan Nysanbaevtyń aıtýynsha, 24 qazannan bastap ólgen ıtbalyqtar tirkele bastaǵannan keıin, barlyq jaýapty qyzmetter oqıǵa ornyna barǵan, sonyń ishinde veterınarlar, ekologtar, gıdrobıologtar men qoǵamdyq uıymdardyń ókilderi de qatysty. Barlyq qajetti synamalar alynǵan.
Alǵashqy zertteýler pasterellez, tyrysqaq jáne oba aýrýlarynyń bar-joǵyn tekserdi, alaıda bul indetter tabylmaǵan. Mınıstrdiń aıtýynsha, qazir mamandar sý túbinde tabıǵı gazdyń shyǵýynan nemese sýdyń lastanýynan ıtbalyqtardyń qyrylýy múmkin ekendigin boljaıdy. Alaıda, sý quramynda normadan aýytqý baıqalmaǵan.
Ǵalymdardyń zertteýlerin aıaqtaýǵa 3-4 aı ýaqyt qajet. Osy kezeńde qorytyndy nátıjeler jarıalanatyn bolady. Sonymen qatar, ekologıa departamentiniń zerthanalary aýanyń, sýdyń jáne topyraqtyń quramyn zerttep, halyqaralyq uıymdardan kómek almaǵan.
Aıta keteıik, Lada.kz portalynyń jazýynsha, aımaqtaǵy ekologıalyq keńestiń tóraǵasy, «ECOJER» qaýymdastyǵynyń Mańǵystaý oblysyndaǵy ókili jáne QR Ekologıa jáne tabıǵı resýrstar mınıstrligi Qoǵamdyq keńesiniń múshesi Ádilbek Qozybaqov ıtbalyqtardyń jappaı qyrylýy boıynsha keltirilgen shyǵyn shamamen 1,5 mıllıard teńgege baǵalanatynyn málimdegen.
«QR Aýyl sharýashylyǵy mınıstrliginiń 2017 jylǵy buıryǵyna sáıkes, bir ıtbalyqtyń quny 193 AEK nemese 712 556 teńge dep belgilengen. Bul somany shamamen 2000 ıtbalyqqa kóbeıtsek, 1 425 112 000 teńge shyǵyn shyǵady», – dedi ol.
Ádilbek Qozybaqov bul jaǵdaıdyń sebebin anyqtaý, kinálilerdi qatań jaýapkershilikke tartý jáne keltirilgen shyǵyndy óteý boıynsha naqty sharalar qabyldaý qajet ekenin atap ótti.
Jaıyq-Kaspıı baseındik ınspeksıasynyń mamany Andreı Rýskııdiń aıtýynsha, ınspektorlar jaǵalaýda kúndelikti monıtorıń júrgizip júp. Ol 23 qarashada teńiz jaǵalaýynda óli ıtbalyqtardyń deneleri tabylmaǵanyn, sondyqtan oń boljam jasaýǵa úmit bar ekenin jetkizdi. Sonymen qatar jeldiń baǵyty ózgergeni de jaǵdaıǵa áser etýi múmkin.
Eske salsaq, Kaspıı jaǵalaýynan bir kúnde 120-dan astam óli ıtbalyq tabylǵan týraly jazǵan edik.