Áleýmettik jelide toı qonaqtarynyń erekshe bıi vırýsqa aınalyp, myńdaǵan qaralym jınady. Jelidegi jurt qonaqtardyń úılesimdi qımyldaryna qarap, bul bıdiń jaı dúnıe emes ekenin talqyǵa saldy. Boljaǵandaı-aq, "fýtbolshylar bıi" dep atalyp ketken bul dástúrli bıdiń tarıhy tereńde jatyr. Aqshamnews.kz tilshisiniń materıalynan bilińiz.
"Fýtbolshylar bıiniń" tarıhy qandaı?
"Fýtbolshylar bıi" - SQO-daǵy Gavrılovka (qazirgi Kókalajar - esk.) aýylynyń dástúrli bıi. Tarıhy 1981–1982 jyldardan bastaý alatyn bul bıdiń úlken qýanyshpen tikeleı baılanysy bar. Bul týraly Gavrılovka aýylynyń turǵyny Maral Kenjahımova áńgimelep berdi.
"Sol jyly jazda festıvál aıasynda Gavrılovka sportshylary spartakıadada birinshi oryn alyp, qýanysh ústine qýanysh qosylyp, aýyldyń bı úıirmesi de kórkem ónerpazdar baıqaýynda jeńiske jetti. Qos jeńisti atap ótý barysynda fýtbol komandasynyń kapıtany Serik Sátıev bı úıirmesiniń jetekshileri Botagóz Estenbekova, Tatána Prohorenko jáne Larısa Topınadan oıynshylarǵa birneshe qımyl úıretýdi ótinedi. Árıne, sportshylardyń kópshiligi bı ıkemine epsiz bolǵandyqtan, qımyldardy jeńildetip, qarapaıymdaý etip jasaǵan. Biraq dál osy qarapaıymdylyq bıdiń basty ereksheligine aınalyp, búkil aýylǵa ortaq dástúrdi qalyptastyrdy", - dedi Maral hanym.
Urpaqtar sabaqtastyǵyna aınalǵan bı
Maral Kenjahımova bul bıdi áleýmettik jelide bóliskennen keıin qyzyǵýshylyq tanytqandardyń kóbeıgenin aıtty.
"Ákelerimiz ben aǵalarymyzdyń bıge asa ıkemi joq bolatyn. Sondyqtan qımyldardy jeńildetýge týra keldi. Biraq osynyń ózi bıdi odan saıyn ereksheledi. Solaısha vıdeodaǵy “fýtbolshylar bıi” paıda boldy. Sodan beri bul bı jyldan jylǵa, urpaqtan urpaqqa úıretilip, aýylymyzdyń naǵyz beınesine aınalyp ketti", - deıdi ol.
Maral hanym úshin bul bı tek kóńil kóterý ǵana emes, aýyldyń tarıhymen astasyp jatqan úlken maqtanyshtyń bólshegi.
Qarapaıym bı qalaısha aýyl brendine aınaldy?
Bı avtorlarynyń biri Larısa Topına jyldar óte kele "fýtbolshylar bıi" aýyldyń shynaıy brendine aınalǵanyn aıtady:
"Instagramnan da, TıkToktan da qaıta-qaıta kórip otyramyn. Bizdiń aýyldyń basty ereksheligi – osy bı. Bir qaraǵanda kishkentaı ǵana aýyl bolǵanymen, biz úshin ol atamekenimiz. Ýaqyt ótse de, qazir úshinshi býyn bılep júr. Ony turǵyndarymyzdyń ár jerde bılep júrgenin kórý qandaı qýanysh! Bútin bir aýyldyń brendine aınalyp ketken "fýtbolshylar bıiniń" mańyzy, qundylyǵy biz úshin erekshe", - deıdi ol.
Búginde bul bıdi Gavrılovka turǵyndary qyz uzatý, toı-merekelerde, túrli jıyndarda mindetti túrde oryndaıdy. Ol aýyl adamdarynyń birligin kórsetetin saltqa aınalyp ketken.
Áleýmettik jelidegi jyly lebizder
Jeli qoldanýshylarynyń pikirleri de erekshe. Beınerolıktiń qaralymy 400 myńnan asyp, 20 myńnan astam laık jınady. Kórermender:
"Kórgen saıyn kóz almaı qaraısyń!", "Keremet kóńil-kúı syılaıdy, bári birdeı bılep tur ǵoı", "Bul aýylda bı kádimgi dástúr sekildi. Qımyldary sondaı úılesimdi", - dep súısinip jatyr.