Astanadaǵy №5 avtobýsta jasóspirimder apattyq balǵalardy urlap ketpek boldy, dep habarlaıdy Aqshamnews.kz tilshisi qalalyq PD-ǵa silteme jasap.
Polısıanyń málimetinshe, qoǵamdyq kólikpen kele jatqan bir top jasóspirim avtobýstyń tótenshe jaǵdaıdaǵy shyǵysyna arnalǵan balǵany bekitkishinen sheship, ózderimen alyp ketpek bolǵan. Olardyń áreketin baıqaǵan júrgizýshi avtobýsty toqtatyp, jasóspirimderdi ustap qalǵan.
Alaıda polısıa shaqyrylǵan sátte jasóspirimderdiń biri buryshty gaz balonyn júrgizýshiniń betine shashyp, oqıǵa ornynan qashýǵa árekettengen.
Qalalyq polısıa departamenti kámeletke tolmaǵandardyń tulǵalary anyqtalǵanyn habarlady.
«Atalǵan fakti boıynsha jasóspirimderdiń ata-analary balalardy tárbıeleý jónindegi mindetterin tıisinshe oryndamaǵany úshin jaýapkershilikke tartyldy», – dep málimdedi polısıa.