BI Group dırektorlar keńesiniń tóraǵasy Aıdyn Rahımbaev kompanıanyń salyq salynatyn kiristerin tómendetkeni týraly BAQ-ta taraǵan aqparattyń qate túsindirilgenin málimdedi. Onyń aıtýynsha, salyq máseleleri negizinen BI Group-tan tólem alatyn jáne arnaıy salyq rejımin qoldanatyn merdigerlerge qatysty, dep habarlaıdy aqshamnews.kz
«BAQ-ta aıtylǵan 11,9 mlrd teńge durys túsindirilmegen: bul – tólenbegen salyq emes, BI-men jumys isteıtin júzdegen shaǵyn kompanıalardyń jalpy aınalymy. Osy aınalymnan salyqtar eseptelýi tıis. Al bul múldem basqa soma», – dep jazdy Aıdyn Rahımbaev Facebook paraqshasynda.
Sonymen qatar, Rahımbaev ótken aptada Qarjy mınıstrligi men Úkimette qurylys salasyndaǵy máselelerdi talqylaǵan birqatar kezdesýler ótkenin atap ótti. Ol aldaǵy kúnderi resmı túsindirme berilýi josparlanyp otyrǵanyn aıtty.