Almaty qalasynyń polıseıleri QR İİM Kıberqylmysqa qarsy kúres departamenti men qalalyq prokýratýranyń qoldaýymen ınternet-alaıaqtyqpen aınalysqan eki keńseniń áreketin áshkereledi.
Jedel-izdestirý sharalary barysynda sheteldik azamat basshylyq etken Call-ortalyq anyqtaldy, dep habarlaıdy aqshamnews.kz Polisia.kz-ke silteme jasap.
Alaıaqtar Ońtústik Azıa elderindegi bank shottarynda buǵattalǵan depozıtterdegi qarajatty sheship alýǵa kómektesemiz degen jalǵan ýáde berip, azamattardy aldaǵan.
— Call-ortalyq qyzmetkerleriniń negizgi mindeti – kýratorlardyń nusqaýymen drop-shottarǵa túsken qarajatty baqylaý jáne olardy basqa shottarǵa aýdarý boldy. Bul qarajat ártúrli tólem júıeleri arqyly taratylyp otyrǵan. Sondaı-aq keńselerdi tintý kezinde aqshalaı operasıalardy óńdeý maqsatynda qoldanylǵan 100-den astam júıelik blok tárkilendi. Almaty halyqaralyq áýejaıynda osy qylmystyq iske qatysy bar taǵy bir adam elden qashpaq bolǵan sátinde ustaldy, — dep málimdedi Almaty qalalyq PD Kıberqylmysqa qarsy kúres basqarmasynyń bastyǵy Anes Qaldybaev.
Tergeý barysynda keńse qyzmetkerleriniń bul jumysty ınternet arqyly tapqany belgili boldy. Olardy suhbattasý kezeńinen bastap oqytýǵa deıin keńse meńgerýshileri uıymdastyrǵan. Jańa qyzmetkerlerge tapsyrmalar berilip, olardyń negizgi mindeti – P2P-tólemderine baılanysty qarajat aýdarymdaryn óńdeý ekeni túsindirilgen. Qyzmetkerlerge jeke uıaly telefon paıdalanýǵa tyıym salynǵan jáne qupıalylyq qatań saqtalǵan. Qazirgi tańda tergeý amaldary jalǵasýda. Úsh adam qamaýǵa alynyp, taǵy 26 kúdiktige qatysty tergeý júrgizilip jatyr.