2 myń kóshe tazartylyp, 600 qoqys jáshigi ornatyldy, 302 zańsyz dúńgirshek súrildi: «Almaty – bizdiń ortaq úıimiz» naýqanynyń alǵashqy aptasy qalaı ótti?
Almatyda «Taza Qazaqstan» respýblıkalyq baǵdarlamasy aıasynda ótip jatqan «Almaty – bizdiń ortaq úıimiz» ekologıalyq naýqanynyń alǵashqy aptasy qorytyndylandy, dep habarlaıdy aqshamnews.kz
1-9 naýryz aralyǵynda ótken alǵashqy apta «Taza kósheler» ataýymen uıymdastyrylyp, qala kóshelerin jappaı tazartý, ınfraqurylymdy retke keltirý jáne zańsyz saýda nysandaryn jappaı súrý sharalaryna baǵyttaldy.
Bir apta ishinde uzyndyǵy 2 777 km bolatyn 2 318 kóshe tazartyldy, 560 aıaldama pavılony, 315 baǵdarsham nysany jáne 1 537 jol belgisi jýylyp, tazalandy. Bul jumysqa 100-den astam arnaıy tehnıka men 240 jumysshy jumyldyryldy.
Atalǵan kezeńde «Qasbetten qasbetke deıingi keshendi tazartý» aksıasy ótti, onyń aıasynda merdiger uıymdar tazalyq jumystaryn júrgizdi. Oǵan kezdeısoq qoqystar men butaqtardy jınaý, qar tazalaý, aryq júıesin tazartý, jol jıekterin sypyrý, jaıaý júrginshiler joldary men kóshelerdi tazartý jumystary kirdi.
Sonymen qatar, aýdan ákimdikteri kásipkerlik sýbektilerimen kóriktendirý qaǵıdalary aıasynda bekitilgen ýchaskelerdiń sanıtarlyq jaǵdaıyn saqtaý qajettiligi týraly túsindirý jumystaryn júrgizdi. Sonyń nátıjesinde kóriktendirý boıynsha 284-ke jýyq tólqujat rásimdeldi.
Qaladaǵy sanıtarlyq jaǵdaıdy jaqsartý maqsatynda Komýnaldyq ınfraqurylymdy damytý basqarmasy kólemi 120 lıtrge deıingi 600-den astam vandalızmge tózimdi qoqys jáshigin ornatty. Jalpy, 2025 jyly qalada 80 jáne 120 lıtrlik 12 036 jańa qoqys jáshigin ornatý josparlanyp otyr.
Aıta keteıik, 2025 jyldyń 4 aqpanynan bastap Almatyda kóshe saýdasyn joıý baǵdarlamasy qyzý júrip jatyr. Búgingi kúnge deıin 302 zańsyz saýda nysany jáne 222 oıyn avtomaty (kúsh ólsheýish) súrildi. Baǵdarlama 15 naýryzǵa deıin jalǵasady.
Naýqan aıasynda Jumyspen qamtý jáne áleýmettik baǵdarlamalar basqarmasynyń qyzmetkerleri «Jaqynyńa járdemdes» aksıasyn ótkizdi. Aksıa barysynda eriktiler qarıalardyń aýlasy men irgeles aýmaqty qar men qoqystan tazalap, azdaǵan jóndeý jumystaryn júrgizdi.
Ekologıa jáne qorshaǵan orta basqarmasy arnaıy uıymdarmen birlesip, «Taza aýa» aksıasy aıasynda 19 stasıonarlyq jáne 3 mobıldi ekologıalyq bekette avtokólik shyǵaryndylaryn baqylaý jumystaryn kúsheıtti.
«Qaýipsiz jol» aksıasy aıasynda magıstralderdi kóriktendirý, jol jabyndaryn jóndeý jáne jol tańbalaryn jańartý jumystary bastaldy. Birinshi aptada 1,2 myń m² jolǵa shuńqyrly jóndeý júrgizilip, nóserli káriz júıesine arnalǵan 24 jańbyr qabyldaǵysh ornatyldy.
Aıta keteıik, 11 naýryzdan bastap naýqannyń ekinshi kezeńi – «Taza saıabaqtar men skverler» bastaldy. Bul kezeńde ózen jaǵalaýlaryn, saıabaqtar men skverlerdi, qoǵamdyq keńistikterdi tazartý jumystary júrgiziledi. Jalpy, naýqan 1 sáýirge deıin jalǵasady. Osy ýaqyt aralyǵynda búkil qalalyq ınfraqurylymdy retke keltirý, 4 myńnan astam aýla aýmaǵyn tazartý, 445 saıabaq pen skverdi jınaý, ózen jaǵalaýlaryn tazartý, 12 myńǵa jýyq kóshedegi vandalızmge tózimdi qoqys jáshigin ornatý, 600-den astam zańsyz saýdan nysandaryn súrý, 5 myń aǵash pen buta otyrǵyzý josparlanǵan.
Tolyq aqparat Almaty.kz saıtynda jarıalanady.