Ahmet Baıtursynulynyń 150 jyldyǵyna oraı uıymdastyrylǵan 5 maýsymda bastalǵan «Ahań júrgen jolmen» ekspedısıasy márege jetti.
Maqsat – ult ustazynyń tabany tıgen jerlerdi aralap, tanymdyq derekter jınaý. Aldymen Qarqaralyda, Aqterek aýylynda ólketanýshy ǵalymdarmen, zıaly qaýym ókilderimen kezdesý ótti, dep habarlaıdy Almaty-akshamy.kz.
1932-1933 jyldary Ahmet Baıtursynuly jer aýdarylǵan Reseıdiń Arhangelsk qalasynda bolyp turǵan úıin taspaǵa túsirdi. 1926 jyly túrkologtar jıyny ótken Ázirbaıjan astanasy Bakýge de at basyn tirep, qundy derekterge qanyqty. Sapar sońynda Almaty mańynda Ahań atylǵan Jańalyq aýylyndaǵy qorymnan topyraq alyp, kindik qany tamǵan ólkege jetkizdi.
"Munymen jumys bitpeıdi. 25-30 mınýttyq fılm daıyndalady. Bolashaqta kitap jazý josparda bar. Óıtkeni Ahańnyń ómiri munymen tolyq qamtylǵan joq. Ahańnyń júrgen saparyn bárin tizip shyqsaq degen oıymyz bar", - deıdi ekspedısıa múshesi Abylaı Maýdanov.