Qyzylorda aımaqtyq Halyqtyq shtab ókilderi «Jibek joly» saýda úıinde azamattarmen erkin kezdesip, AES salýdyń mańyzdylyǵy týraly keńinen túsindirdi. Kezdesý barysynda turǵyndardyń suraqtaryna jaýap berdi.
Shtab múshesi Beıbitkúl Karımova stýdenttermen áńgimelesý barysynda atom energetıkasynyń elimizdiń energetıkalyq qaýipsizdigi úshin mańyzyn atap ótti:
«Búginde turaqty jáne qaýipsiz energıamen qamtamasyz etý barlyq memleketter úshin strategıalyq másele. Halyqaralyq sarapshylardyń pikirinshe, atom energetıkasy eldiń energetıkalyq qaýipsizdigin qamtamasyz etýdiń negizgi quraly bolyp tabylady. Dástúrli jáne jańartylatyn energıa kózderi turaqty óndiris bere almaıdy, sondyqtan elimizde beıbit atom energıasyn qoldaný baǵytynda ǵalymdar kóp jumys atqarýda. Qazaqstanda atom salasynda 17,9 myń adam jumys isteıdi, onyń ishinde «Qazatomónerkásip» UAK» AQ-da – 15 myńǵa jýyq jumysshy bar. Atom ónerkásibindegi stýdentterdiń sany 9 myńǵa jetedi», – dedi ol.
Kezdesý barysynda jastar da qalys qalmady. Olar shtab múshelerinen energıa tarıfteri men shıkizat máseleleri týraly suraqtar qoıdy. Bul suraqtarǵa shtab múshesi Gúlshat Musaeva jaýap berdi.
«Atom elektr stansıasynda óndiriletin elektr energıasynyń quny basqa energıa kózderimen salystyrǵanda joǵary bolmaıdy, sebebi otynnyń baǵasy turaqty, energıa syıymdylyǵy joǵary jáne stansanyń qyzmet etý merzimi 60 jylǵa sozylady, ony 80 jylǵa deıin uzartý múmkindigi bar. Qazaqstan tabıǵı ýrannyń barlanǵan qory boıynsha álemde ekinshi orynda. Barlyq álemdik qorlardyń 14%-ǵa jýyǵy Qazaqstannyń tereń qoınaýynda ornalasqan, onyń 70%-y ekologıalyq taza jerasty siltileý ádisi arqyly óndiriledi. Búginde Qazaqstan álemdegi ýran óndirisiniń shamamen 40%-yn qamtamasyz etip, ýran óndirýde birinshi orynda tur», – dedi Gúlshat Musaeva.
Elimiz AES salý arqyly óz energetıkalyq táýelsizdigin nyǵaıtýǵa jáne sheteldik energıaǵa táýeldilikti azaıtýǵa úlken múmkindik alady.