Kezekti «TALQYLAU» dıalog alańynyń otyrysynda «Qazaqstandyq elektr energetıkasy qaýymdastyǵy» ZTB tóraǵasy Talǵat Temirhanov eldegi elektr energıasynyń jetispeýshiligine nazar aýdardy.
«Qazirgi ýaqytta elimizde 30 iri ınvestısıalyq joba qarastyrylýda. Olardy sátti júzege asyrý úshin 8 gıgavatt elektr energıasy qajet bolady. Bul elde óndiriletin jalpy kólemniń jartysyna jýyǵyn quraıdy. Mundaı energıany qaıdan alamyz? Búginde elimizdegi elektr energıasynyń shamamen 60%-yn kómir generasıasy qamtamasyz etedi, onyń 80%-y 60 jyldan astam ýaqyt boıy jumys istep keledi. Sonymen qatar, kómirtegi beıtaraptylyǵyna qatysty talaptar bar. Bul bizdi mańyzdy sheshim qabyldaýǵa májbúr etedi. Osyǵan baılanysty, Halyqtyq shtabtyń jumysyn joǵary baǵalaımyn, óıtkeni olar barlyq aspektilerdi muqıat taldap, halyqqa obektıvti aqparat jetkizip jatyr», – dedi ol.
Aıta ketý kerek, otyrys Qazaqstan halqyna Joldaýǵa jáne el ómirindegi mańyzdy qadamdardyń biri – AES qurylysy máselesine arnaldy, onda qatysýshylar óz pikirleri men usynystaryn bildirdi.