Atom elektr stansıasyn salý jónindegi referendým qarsańynda óńirlerde túsindirý jumystary belsendi túrde júrgizilýde. A.S. Pýshkın atyndaǵy oblystyq kitaphanada ótken kezdesýde sala mamandary jergilikti turǵyndardyń suraqtaryna jaýap berdi.
Kezdesýde D.Serikbaev atyndaǵy SHQTÝ-dyń sáýlet, qurylys jáne energetıka mektebiniń dekany, qaýymdastyrylǵan profesor, PhD doktory, QR qurmetti energetıgi Aıbek Aqaev AES salýdyń mańyzyn túsindirdi.
«Elimizde qazirgi ýaqytta elektr energıasynyń tapshylyǵy baıqalýda. Bolashaqta jańa zaýyttar men fabrıkalardyń ashylýy bul jaǵdaıdy odan ári kúrdelendirýi múmkin. AES salý - turaqty ári úzdiksiz elektr energıasyn óndirýdiń tıimdi joly. Bul aldaǵy energetıkalyq qıyndyqtardy sheshýdiń mańyzdy qadamy», – dedi Aıbek Aqaev.
Halyqtyq shtab múshesi Nurıddın Ámıtov bolashaq urpaqtyń ál-aýqatyn qamtamasyz etý úshin bul máselege beıjaı qaramaýǵa shaqyrdy. Onyń aıtýynsha, AES salý – tek búgingi kúnniń emes, bolashaqtyń ıgiligine baǵyttalǵan sheshim.
Serik Dúısenbaev, Jorabek Nurymbetov jáne Nurıddın Ámıtovten quralǵan Halyqtyq shtab músheleri Jańaqorǵan jáne M.Nálibaev aýyldarynda bolyp, jergilikti turǵyndarmen pikir almasty. Onda Memleket basshysynyń Joldaýynda aıtylǵan ekonomıkalyq reformalar men AES salýdyń strategıalyq mańyzy jan-jaqty talqylandy.
«Búgingi tańda jasyl energıany paıdalaný damyǵan elderde keńinen qoldanysqa enýde. Qazaqstan - ýran qory boıynsha álemdegi jetekshi memleketterdiń biri. Osy artyqshylyqtarymyzdy paıdalana otyryp, atom energetıkasyn damytý ekonomıkalyq tıimdilikti arttyrady jáne klımattyń ózgerýimen kúresýdiń tıimdi joly bolyp tabylady», – dep túsindirdi Serik Dúısenbaev.
Jorabek Nurymbetov bul sheshimderdiń elimizdiń energetıkalyq saıasatyna ǵana emes, ekologıaǵa da oń áser etetinin atap ótti.
Shıeli aýdanynda ótken kezdesýlerde Bestam aýylynyń turǵyndary jáne densaýlyq saqtaý salasynyń ókilderi AES qurylysynyń mańyzdylyǵyn talqylady. Halyqtyq shtab múshesi Jorabek Nurymbetov aldaǵy onjyldyqta energetıka salasynda jaǵdaı kúrdelene túsetinin aıtty.
«Energıaǵa degen suranys kún ótken saıyn artyp keledi. Tabıǵı ósim men ekonomıkanyń damýymen birge bul qajettilik odan ári ósýde. Sondyqtan AES – uzaq merzimdi turaqty energıa kózi retinde mańyzdy joba», – dedi Jorabek Nurymbetov.
Serik Dúısenbaev AES jobasynyń iske asyrylýy elektr energıasynyń qunyn tómendetýge jáne ekologıalyq taza energıa óndirýge yqpal etetinin aıtty.
Densaýlyq saqtaý salasynyń mamandary Prezıdenttiń árbir bastamasy qoǵamnyń jáne eldiń ıgiligi úshin jasalyp otyrǵanyn jetkizdi. Medısınalyq mekemeler zamanaýı qondyrǵylarmen jabdyqtalǵandyqtan, elektr energıasyna táýeldi ekenin aıtyp, AES salýdy qoldaıtyndaryn bildirdi.