Kópshilik jurt atom reaktorlaryn qaýipti dep oılaıdy. İs júzinde atom elektr stansıalary, ásirese, Qazaqstanǵa usynylyp otyrǵan sý-sýly energetıkalyq reaktorlar álemdegi eń qaýipsiz reaktorlar bolyp esepteledi. Qazirgi tańda álemde 415 reaktor jumys istep tursa, sonyń 250-ge jýyǵy osy sý-sýly reaktorlar. Onyń ústine qazirgi 3+ urpaqtaǵy AES-terde aktıvti jáne pasıvti ózara birin-biri qaıtalaıtyn qaýipsizdik júıeleri bar. Ǵylymı esepter boıynsha belsendi aımaqtarda AES-terde qandaı da bir aýyr apattyń bolýy yqtımaldyǵy óte tómen. Aıtalyq, 10 mıllıon jylda bir ret dep esepteledi, bul óte tómen yqtımaldylyq.
Sonymen qatar, qarapaıym azamattar arasynda AES bolǵan jerde odan keminde 50 shaqyrym aýmaqta ómir súrýge bolmaıdy, radıasıa taraıdy degen qate túsinik bar. Shyn máninde, qazirgi zamanǵy 3+ urpaq atom reaktorlaryndaǵy sanıtarlyq qorǵaý aımaǵy tek AES alańymen ǵana shekteledi. Iaǵnı, AES aýmaǵynan 3 shaqyrymnan tysqary aýmaq radıasıalyq qaýipti aımaq bolyp sanalmaıdy.
Eger aldaǵy referendým oń sheshimin taýyp jatsa, AES salý elimizge úlken mýltıplıkatıvti áser beredi. Bul degenimiz elimizge jańa, buryn bolmaǵan aýqymdy ıadrolyq tehnologıanyń kelýi. Bul – Qazaqstandy álemdegi ıadrolyq tehnologıasy bar 32 eldiń qataryna qospaq. Sonymen qatar, AES-tiń 10–12 jyldyq qurylys barysynda 8000–10000 adamǵa deıin jumyspen qamtı alady, ári búkil joba barysynda 2-3 mlrd AQSH dollary salyq retinde elimizge túsedi. Joba aıaqtalǵannan keıin de 2 myńǵa jýyq turaqty jumys orny paıda bolady.
AES eldiń ınvestısıalyq tartymdylyǵyna úlken áserin beredi. Kópke málim, iri ınvestorlardyń basty talaptary qashanda turaqty energıa kózi. AES bul talaptyń senimdi kepili bola alady jáne ekologıalyq turǵyda barlyq talaptardy qanaǵattandyrady.
Árıne, elimizdiń energetıkalyq táýelsizdigi turǵysynan da kóptegen tıimdilikterin aıtýǵa bolady. AES eń aldymen turaqty energıa kózi bolǵandyqtan, bul óndiris pen turmys úshin mańyzdy. Qazir Qazaqstan 2,6 mlrd KVt/saǵat elektr energıasyn kórshi elderden ımporttap otyr. Elektr energıasyna degen tapshylyq halyq sanynyń, ekonomıka men óndiris oryndarynyń ulǵaıýyna baılanysty jyl saıyn óse beretin bolady. Kómirmen jumys istep turǵan stansıalarymyzdyń 70 paıyzy tozǵan. Eger biz turaqty generasıa kózin jasamasaq, bul túbi ekonomıkamyzǵa keri áserin tıgizedi.