Búgingi tańda dúnıe júzindegi jáne kórshiles elderdegi geosaıası jaǵdaıdyń kúrdelenýi kezinde Prezıdent Qasym-Jomart Toqaevtyń kezekti Joldaýy úlken optımısik mańyzǵa ıe. Negizinen, Prezıdent halyqqa burynǵy Joldaýda aıtylǵan máselelerdiń sheshilgeni nemese áli de sheshilmegeni týraly aıtyp ótti. Bizdiń baıqaǵanymyz, Prezıdent árbir Joldaýyn el bolashaǵyn eleń etkizetin ótkir máseleler men ult bolashaǵyna arnalǵan josparlar negizinde qurastyryp otyr.
Degenmen, ekonomıkalyq, áleýmettik, bilim berý, tárbıe, ǵylym, ekologıa, demografıalyq jáne ónerkásip sıaqty máselelerdi sheshý baǵyttary anyq. Atap aıtqanda, aldymen aqsha-nesıe saıasaty men fıskaldy saıasat arasyndaǵy úılesimsizdikti joıý qajettigi kórsetildi. Bul elimizde kóptegen azamattardyń bankterge qaryzǵa batyp, qarjylyq problemalarǵa tap bolyp otyrǵanyn ańǵartady. Osyny Memleket basshysy erekshe atap ótti. Sondyqtan «Qaryzsyz qoǵam» jobasy aıasynda halyqty bilimge, jastardy adal eńbek etýge shaqyrdy.
Qazir búkil álemde sıfrlyq tehnologıalar men jasandy ıntellektke qatysty báseke qyzyp tur. Barlyq jerde resýrs úshin talas júrýde. Klımattyń ózgerýi, azyq-túlik qaýipsizdigi jáne demografıalyq turǵydan ornyqty damý eń ózekti máselelerge aınalǵan. Bir sózben aıtqanda, adamzat tarıhynda buryn-sońdy bolmaǵan syn-qaterler men túbegeıli ózgerister dáýiri bastaldy. Sonymen qatar, Joldaýda sóz bolǵandaı, Atom elektr stansıasyn salý máselesi áleýmettik jelilerde keńinen talqylanýda. Prezıdent qoǵamda úlken rezonans týdyryp otyrǵan zorlyq-zombylyq, áleýmettik qıyndyqtar, medısına salasyndaǵy qyzmet sapasynyń tómendigi, bilim berý men ǵylymdaǵy sáıkessizdikter sıaqty máselelerge jan-jaqty toqtalyp ótti. Bıyl qazan aıynda ótetin Atom elektr stansıasyn salýǵa qatysty jalpyulttyq referendým da óte ózekti másele bolyp otyr.