QR medısınalyq avıasıa qyzmeti kún saıyn el boıynsha 3-ten 15-ke deıin reıs jasaıdy
Qazaqstan Respýblıkasy Densaýlyq saqtaý mınıstrliginiń «Jedel medısına ulttyq úılestirý ortalyǵynyń» basqarma tóraǵasy Arman Baıanbaev Almaty qalasy Óńirlik komýnıkasıalar qyzmetiniń brıfıńinde jedel avıasıalyq kómek, dálirek aıtqanda, medısınalyq avıasıa, jaǵdaıy aýyr naýqastardy evakýasıalaý jáne ushý geografıasy jaıly aıtyp berdi, dep habarlaıdy Almaty-akshamy.kz.
Atap óteıik, medısınalyq avıasıa – bul áýe kóligin tartý arqyly halyqqa shuǵyl túrde jedel medısınalyq kómek kórsetý. Respýblıkalyq deńgeıde atalǵan kómek el turǵyndaryna 2011 jyldyń sáýirinen bastap kórsetile bastady. Jyl saıyn bul qyzmetke elimizdiń úsh myńnan astam azamaty zárý.
Arman Baıanbaev QR azamattaryna medısınalyq avıasıa túrinde shuǵyl medısınalyq kómek kórsetý tegin medısınalyq kómektiń kepildik berilgen kólemi aıasynda júzege asyrylatynyn atap ótti.
Bizdiń elimizde medısınalyq avıasıa jumysy kelesi baǵyttar boıynsha júrgiziledi:
- Bul naýqastar tasymaldaýǵa jaramsyz, aýyr halde bolsa, aımaqtyq dárigerlerdiń qajetti tehnıkasy nemese biliktiligi bolmasa, mamandardyń konsýltasıa júrgizý nemese operasıa jasaý úshin oqıǵa ornyna ushyp kelýi.
- Mamandandyrylǵan medısınalyq kómek kórsetý úshin naýqastardy óńirlerden oblysqa, oblystan respýblıkalyq ortalyqqa tasymaldaý, onda olarǵa joǵary tehnologıalyq kómek kórsetiledi.
- Donorlyq organdar men bıometarıaldy tasymaldaý.
- Qashyqtan kórsetiletin medısınalyq qyzmetter.
«Búginde medısınalyq avıasıa respýblıka boıynsha orta eseppen táýligine 3-ten 15-ke deıin reıs jasaıdy. Reısterdiń eń kóp úlesi jaraqattaný, onyń ishinde jol-kólik oqıǵalary saldarynan bolǵan, sondaı-aq balalar arasyndaǵy patologıa jaǵdaılarynda, qan aınalymy júıesi aýrýlary, jańa týǵan nárestelerdiń patologıasy, akýsherlik jáne gınekologıalyq, hırýrgıalyq, terapevtik patologıalar jáne basqa da aýrýlar kezinde medısınalyq kómek kórsetý maqsatynda júzege asyrylady, - dedi ÓKQ spıkeri.
El aýmaǵynyń úlkendigin eskere otyryp, ortalyq jumys istegen jyldar ishinde jedel medısınalyq mamandandyrylǵan kómek kórsetýdiń arqasynda, sonyń ishinde, joǵary mamandandyrylǵan medısınalyq kómek kórsetý, mamandardy jetý qıyn aımaqtarǵa jetkizý, naýqastardy, sondaı-aq keıinnen transplantasıalaý úshin donorlyq organdardy tasymaldaý kómegimen myńdaǵan adamnyń ómirin saqtap qaldy. Halyqqa jedel medısınalyq kómek kórsetý qajettiligi jyl saıyn artyp keledi.
Qazirgi ýaqytta medısınalyq avıasıanyń 33 áýe kemesi bar – 20 ushaq jáne 13 tikushaq paıdalanylady. Barlyq paıdalanylatyn áýe kemeleriniń Qazaqstan Respýblıkasynyń Azamattyq avıasıa komıtetiniń sertıfıkaty bar.
Osy qyzmettiń negizi qalanǵannan beri (2011 jyldan bastap) 2022 jyldyń qazan aıyna deıingi barlyq qyzmet kezeńinde medısınalyq avıasıa salasynda oryndalǵan ushýlar sany 22 665 reısti qurady.
Donorlyq aǵzalardy alý jáne tasymaldaý úshin 78 reıs jasaldy. Shetelde aýyr halde jatqan Qazaqstan Respýblıkasynyń azamattary men qandastardy elimizdiń emhanalaryna jetkizý maqsatynda álemniń 25 eline 107 sheteldik reıs jasaldy.